بۇگىن اباي ۋنيۆەرسيتەتىندە جاڭا اقپاراتتىق تەحنولوگيالار جانە جاساندى ينتەللەكت فاكۋلتەتىنىڭ رەسمي اشىلۋ سالتاناتى ءوتتى. زاماناۋي تەحنولوگيالاردىڭ زامانى داۋىرلەگەن ۋاقىتتا قۇرىلعان فاكۋلتەت جاڭا بۋىن پەداگوگتارىن دايارلاۋدى ماقسات ەتەدى.
بيىل مەملەكەت باسشىسى قاسىم-جومارت توقاەۆتىڭ باستاماسىمەن تسيفرلاندىرۋ جانە جاساندى ينتەللەكت جىلى دەپ جاريالانعانى بەلگىلى. وسىعان بايلانىستى قاسيەتتى قارا شاڭىراقتا ءتۇرلى يگى باستامالار قولعا الىندى. نەگىزگى يدەيا – جاڭا زامان تالابى قويىپ وتىرعان تاۋەكەلدەرگە دايىن بولا وتىرىپ، زاماناۋي ءارى يننوۆاتسيالىق تۇرعىدان ويلايتىن جاڭا بۋىن پەداگوگتارىن قالىپتاستىرۋ. وسى ماقساتتا بۇگىن جاڭادان اشىلعان اقپاراتتىق تەحنولوگيالار جانە جاساندى ينتەللەكت فاكۋلتەتىنىڭ تۇساۋى سالتاناتتى تۇردە كەسىلىپ، ستۋدەنتتەرگە ەسىگىن ايقارا اشتى. جيىندى اشقان اباي اتىنداعى قازۇپۋ باسقارما توراعاسى-رەكتور بولات تىلەپ جاڭا فاكۋلتەتتىڭ قۇرىلۋى – مەملەكەت باسشىسى قاسىم-جومارت توقاەۆتىڭ جاساندى ينتەللەكتىنى ەل دامۋىنىڭ باسىم باعىتتارىنىڭ ءبىرى رەتىندە ايقىنداعان تاپسىرماسىن جۇزەگە اسىرۋ ماقساتىندا ۇيىمداستىرىلعانىن اتاپ ءوتتى.
– ءبىز ستۋدەنتتەرگە جاڭا، زاماناۋي ءبىلىم بەرۋىمىز كەرەك. سوڭعى جىلدارى ۋنيۆەرسيتەتتە جاساندى ينتەللەكتكە باعىتتالعان عىلىمي جوبالار كوبەيدى. دەمەك، جاڭا فاكۋلتەت ءوز جۇمىسىن ەندى عانا باستاپ وتىرعان جوق. ونىڭ سۇيەنەتىن عىلىمي نەگىزى، جيناقتالعان تاجىريبەسى، بىلىكتى ماماندارى جەتكىلىكتى. ارينە، جاساندى ينتەللەكت مۇعالىمنىڭ ورنىن الماستىرمايدى. بىراق، ءبىز ونى كومەكشى قۇرال رەتىندە پايدالانۋعا ۇيرەتەمىز ءارى زاماناۋي تەحنولوگيالاردى مەڭگەرگەن پەداگوگ مامانداردى دايارلايمىز، – دەدى بولات اناپياۇلى.
تۇساۋكەسەر راسىمىندە فاكۋلتەتتىڭ ماقسات-مىندەتتەرى ايقىندالىپ، اكادەميالىق قۇرام مەن مۇمكىندىكتەرى تانىستىرىلدى. جاڭا بۋىن پەداگوگ ماماندارىن دايارلاۋعا قاتىستى ماتەريالدىق-تەحنيكالىق بازا مەن ءتۇرلى زەرتحانالار كوز قۋانىشىنا اينالدى.
بۇگىندە فاكۋلتەتتە ءتورت ءبىلىم بەرۋ باعدارلاماسى بويىنشا 810 ستۋدەنت ءبىلىم الىپ جاتىر. ونىڭ ىشىندە IT جانە جاساندى ينتەللەكت باعىتىنا 300-گە جۋىق ءبىلىم الۋشى قابىلدانعان. فاكۋلتەت جاساندى ينتەللەكت جانە ماشينالىق وقىتۋ، باعدارلامالىق ينجەنەريا، اقپاراتتىق جۇيەلەر، كيبەرقاۋىپسىزدىك، دەرەكتەردى تالداۋ جانە Data Science, روبوتوتەحنيكا جانە ينتەللەكتۋالدى جۇيەلەر، تسيفرلىق پەداگوگيكا، گەنەراتيۆتى جاساندى ينتەللەكت جانە اقپاراتتىق تەحنولوگيالار سالالارى بويىنشا جۇمىس ىستەيدى.
جاڭا فاكۋلتەتتىڭ باستى ەرەكشەلىگى – IT سالاسىنداعى ءبىلىمدى پەداگوگيكالىق باعىتپەن ۇشتاستىرىپ، جي جاۋاپكەرشىلىگىن مەڭگەرگەن تسيفرلىق مۇعالىمدەردى سومداپ شىعارۋ.
