قازاقستان اۋماعىنا رەسەيدىڭ اسكەري ۇشاعى شۇعىل قونىپ، اقش ۇشاعى ەل اسپانىن كەسىپ وتكەن، دەپ حابارلايدى "ادىرنا" ۇلتتىق پورتالى.
اتىراۋداعى حيۋاز دوسپانوۆا اتىنداعى حالىقارالىق اۋەجاي اۋماعىنا رەسەيلىك سۋ-30 كوپماقساتتى جويعىش ۇشاعى قونعان.
جەرگىلىكتى باسىلىمدار وقيعانىڭ 20 اقپان كۇنى تاڭەرتەڭ بولعانىن حابارلادى.
الدىن الا مالىمەت بويىنشا، ۇشاقتى رەسەي فەدەراتسياسىنىڭ ازاماتى دميتري نيفانتەۆ باسقارعان. اۋە كەمەسى كاسپي تەڭىزى اكۆاتورياسىندا اسكەري وقۋ-جاتتىعۋ ۇشۋىن ورىنداپ جۇرگەن.
ۇشۋ بارىسىندا پيلوت باعىتىنان جاڭىلىپ، كەيىن شۇعىل تۇردە اتىراۋ اۋەجايىنا قونۋ تۋرالى شەشىم قابىلداعان. قونۋ شتاتتىق رەجيمدە ءوتتى، اۋەجاي جۇمىسىنا جانە جولاۋشىلارعا قاۋىپ تونبەگەن. بارلىق رەيستەر كەستە بويىنشا ورىندالعان.
ۇشاق جەرگە قونعاننان كەيىن پيلوتقا مەديتسينالىق كومەك كورسەتىلدى. قاجەتتى راسىمدەردەن سوڭ جانە كەلىسىمدەردەن كەيىن جويعىش قازاقستان اۋماعىنان شىعىپ، رەسەيگە قايتا ۇشىپ كەتكەن.
قازىرگى تاڭدا وقيعانىڭ ءمان-جايىن قۇزىرلى ورگاندار انىقتاپ جاتىر.
سونىمەن قاتار، اقش ۇشاعى قازاقستان اۋماعىن كەسىپ وتكەن.
ول مۋرمان وبلىسى ارقىلى رەسەي اۋماعىنا كىرىپ، كەيىن قازاقستانعا قاراي ۇشقان.
Boeing 787-8 Dreamliner – اقش-تىڭ ۆاشينگتون قالاسىنداعى ەندريۋس اۋە بازاسى اۆياتسيالىق بازاسىنان ۇشىپ شىققان. ۇشاق گرەنلانديا، نورۆەگيا جانە فينليانديانىڭ اۋە كەڭىستىگىن كەسىپ وتكەن.
قازاقستان ۋاقىتى بويىنشا ساعات 11:10-داعى مالىمەتكە سايكەس، اۋە كەمەسى قازاقستاننىڭ اۋە كەڭىستىگىندە بولعان.
Boeing 787 Dreamliner – ۇزاق قاشىقتىققا ارنالعان، ەكى قوزعالتقىشتى ۇشاق. بۇل ۇشاقتاردى اقش-تاعى Boeing كومپانياسى Boeing 767 ۇشاعىنىڭ ورنىنا جاساپ شىعارعان.
