ۇلىتاۋ وبلىسىندا قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆتىڭ قاتىسۋىمەن مەملەكەت باسشىسى قاسىم-جومارت كەمەلۇلى توقاەۆتىڭ 2025 جىلعى 8 قىركۇيەكتە جاريالاعان «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىن تالقىلاۋعا ارنالعان كەڭەس ءوتتى.
جيىننىڭ باستى ماقساتى – پرەزيدەنت جولداۋىندا ايقىندالعان باسىم باعىتتاردى ءوڭىر دەڭگەيىندە ءتيىمدى جۇزەگە اسىرۋ شارالارىن پىسىقتاۋ.
كەڭەس بارىسىندا ۇلىتاۋ وبلىسىنىڭ اكىمى داستان رىسپەكوۆ مەملەكەت باسشىسىنىڭ جولداۋى ەلدىڭ تسيفرلىق ترانسفورماتسياسىنا، الەۋمەتتىك ساياساتتىڭ جاڭارۋىنا جانە ەكونوميكانى ارتاراپتاندىرۋعا باعىتتالعانىن اتاپ ءوتتى.
«پرەزيدەنتىمىز اتاپ وتكەندەي، الەمدىك دەڭگەيدە ينۆەستيتسيالار ءۇشىن باسەكەلەستىك ارتىپ كەلەدى. سوندىقتان ءبىز ءۇشىن جاڭا ينۆەستيتسيالىق كەزەڭ باستالدى. ينۆەستورلارعا بارىنشا قولايلى جاعداي جاساپ، ءوڭىر ەكونوميكاسىن تۇراقتى دامىتۋ – باستى مىندەتىمىز»، – دەدى وبلىس اكىمى.
كەڭەس وتىرىسىندا وبلىستىق كاسىپكەرلىك جانە ونەركاسىپ باسقارماسىنىڭ باسشىسى دانيار ارىنعازين ۇلىتاۋ وڭىرىندەگى ينۆەستيتسيالىق احۋال مەن جاڭا جوبالار تۋرالى بايانداما جاسادى.
سونىمەن قاتار وبلىستىق تسيفرلىق تەحنولوگيالار باسقارماسىنىڭ باسشىسى ەرمەك جازىلحانۇلى وڭىردە تسيفرلاندىرۋ جانە جاساندى ينتەللەكت تەحنولوگيالارىن ەنگىزۋ باعىتىنداعى جۇمىستارمەن تانىستىردى.
قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ ءوز سوزىندە جولداۋدا بەلگىلەنگەن ستراتەگيالىق باعىتتاردىڭ ءمان-ماڭىزىنا توقتالىپ، وڭىرلەردە جۇزەگە اسىرۋدىڭ ناقتى تەتىكتەرىن اتاپ ءوتتى.
«جاساندى ينتەللەكت پەن تسيفرلاندىرۋ – تەك تەحنولوگيا ەمەس، ول مەملەكەتتى باسقارۋدىڭ، ەكونوميكانى دامىتۋدىڭ جانە حالىق ءومىرىن جاقسارتۋدىڭ جاڭا مادەنيەتى. بۇل ۇدەرىسكە ءار ءوڭىردىڭ بەلسەندى قاتىسۋى وتە ماڭىزدى»، – دەدى مالىك نۇرجانۇلى.
كەڭەستى قورىتىندىلاعان ءوڭىر باسشىسى داستان رىسپەكوۆ جولداۋداعى مىندەتتەردى ورىنداۋ – بارشا مەملەكەتتىك ورگان مەن قوعامنىڭ ورتاق جاۋاپكەرشىلىگى ەكەنىن ايتىپ، بىرلەسىپ جۇيەلى جۇمىس جۇرگىزۋگە شاقىردى.
كەڭەس قورىتىندىسى بويىنشا جولداۋدان تۋىندايتىن مىندەتتەردى جۇزەگە اسىرۋ جونىندە ناقتى تاپسىرمالار بەرىلدى.
