اباي وبلىسىندا سوت سەمەي تۇرعىنىنا ءورت تۋرالى جالعان اقپارات تاراتقانى ءۇشىن ايىپپۇل سالدى، دەپ حابارلايدى "ادىرنا".
وقيعا 2026 جىلدىڭ 3 ناۋرىزىندا سەمەي قالاسىنداعى «Balapark» بالالار ويىن-ساۋىق ورتالىعىندا بولعان ورتتەن كەيىن تىركەلگەن. توتەنشە جاعداي قىزمەتتەرىنىڭ جەدەل ارەكەتىنىڭ ارقاسىندا ادام شىعىنى بولعان جوق.
الايدا قالا تۇرعىنى Instagram الەۋمەتتىك جەلىسىندەگى قالالىق پابليكتەردىڭ بىرىندە ءورت سالدارىنان 18 ادامنىڭ قازا تاپقانى تۋرالى جالعان مالىمەت جاريالاعان.
اباي وبلىسى پروكۋراتۋراسىنىڭ مالىمەتىنشە، مۇنداي اقپارات قوعام اراسىندا نەگىزسىز ۇرەي تۋعىزىپ، قوعامدىق تارتىپكە كەرى اسەر ەتۋى مۇمكىن.
جەدەل جۇرگىزىلگەن تەكسەرۋ ناتيجەسىندە قۇقىق بۇزۋشىنىڭ جەكە باسى انىقتالىپ، وعان قاتىستى اكىمشىلىك ءىس قوزعالدى. سوت وتىرىسى بارىسىندا ايەل ءوز كىناسىن تولىق مويىندادى.
سوت شەشىمىمەن ول قر اقبتك-ءنىڭ 456-2-بابى 3-بولىگى بويىنشا كىنالى دەپ تانىلىپ، 86 500 تەڭگە كولەمىندە ايىپپۇل تولەۋگە مىندەتتەلدى.
