قازاقستاندا "نەسيە جاپپاي كەشىرىلە مە؟"

3954
Adyrna.kz Telegram

وسى ايدىڭ باسىندا الەۋمەتتىك جەلىدە "يپوتەكالىق تۇرعىن ءۇي قارىزدارى بويىنشا نەسيەلىك راقىمشىلىق جاريالانىپتى" دەپ ايتىلعان ۆيدەولار تاراي باستادى. وسىعان وراي قارجى نارىعىن رەتتەۋ جانە دامىتۋ اگەنتتىگى رەسمي مالىمدەمە جاسادى، دەپ حابارلايدى "ادىرنا" ۇلتتىق پورتالى Express Qazaqstan. سايتىنا سىلتەمە جاساپ.

قازىرگى كەزدە ەلىمىزدە 2007-2008 جىلدارداعى الەمدىك قارجى داعدارىسى مەن ۇلتتىق ۆاليۋتا باعامىنىڭ السىرەۋىنەن يپوتەكا بويىنشا قارىز الۋشىلار زارداپ شەكتى. ولارعا كومەك كورسەتۋ ءۇشىن اگەنتتىك "يپوتەكالىق قارىزداردى قايتا قارجىلاندىرۋ" دەگەن باعدارلاما ۇسىنىپ وتىر.

باعدارلاما 2004-2009 جىلدار ارالىعىنداعى كەزەڭدە تەڭگەمەن يپوتەكالىق قارىزدار، سونداي-اق 2016 جىلعى 1 قاڭتارعا دەيىن ۆاليۋتالىق يپوتەكالىق قارىز العاندارعا قارجىلاي قولداۋ كورسەتۋگە باعىتتالعان،

— دەيدى اگەنتتىكتەگىلەر.

بۇل باعدارلاماعا قاتىسۋ ءۇشىن حالىقتىڭ الەۋمەتتىك وسال توپتارىنا جاتاتىن ازاماتتار بيىلعى 1 جەلتوقسانعا دەيىن نەسيە بەرۋشى بانككە ءوتىنىش ءتۇسىرۋى كەرەك.

"قوسىمشا قارجىلاي كومەكتىڭ مولشەرىن جانە تالاپتارىن بانكتەر قارىز الۋشىنىڭ قارجىلىق جاي-كۇيىن تالداۋ نەگىزىندە جەكە تارتىپپەن ايقىندايدى. ەل ازاماتتارىنا دايەكسىز مالىمەتتەرگە سەنبەۋگە شاقىرىپ، باسشىلىققا تەك رەسمي ءارى تەكسەرىلگەن دەرەككوزدەردەن الىنعان اقپاراتتى الۋدى سۇرايمىز", — دەپ مالىمدەدى اگەنتتىكتەگىلەر.

ءبىر سوزبەن ايتقاندا، نەسيەگە راقىمشىلىق جاسالادى دەگەن ءسوز شىندىققا جاناسپايدى. تەك اتالعان اگەنتتىك تولەۋگە قاۋقارى جوقتارعا جەڭىلدىك ۇسىنىپ وتىر.

ال يپوتەكالىق قارىزداردى قايتا قارجىلاندىرۋ باعدارلاماسىنىڭ تالاپتارى مەن ناتيجەلەرى تۋرالى بارىنشا تولىق اقپاراتتى مىنا جەردەن الۋعا بولادى.

"ادىرنا" ۇلتتىق پورتالى 

پىكىرلەر