سەمەيدە ويشىل، اقىن، اۋدارماشى، كومپوزيتور شاكارىم قۇدايبەردىۇلىنىڭ ەسكەرتكىشى اشىلدى. شاراعا وبلىس اكىمى نۇرلان ۇرانحاەۆ، وبلىستىق ءماسليحات توراعاسى شالقار بايبەكوۆ، دەپۋتاتتار، عالىمدار، ابايتانۋشىلار، قوعام بەلسەندىلەرى مەن وبلىس تۇرعىندارى قاتىستى.
شاكارىم قۇدايبەردىۇلىنا ارنالعان ەسكەرتكىشتىڭ ۇزىندىعى - تۇعىرىمەن قوسا العاندا 7,7 مەتر. «شاكارىم قۇدايبەردىۇلى» اتتى مۇسىندىك كومپوزيتسياسى قولادان قۇيىلىپ، تۇعىرى تۇتاس گرانيتتەن جاسالعان. بۇل كومپوزيتسيا ارقىلى ءمۇسىنشى شاكارىمنىڭ دانىشپان بەينەسىن وڭ قولىنا كىتاپ، سول قولىنا تاسبيح ۇستاتۋ ارقىلى بەينەلەپ كورسەتتى. ەسكەرتكىش اۆتورى – نۇربول قاليەۆ. ونەر تۋىندىسى شاكارىم داڭعىلى مەن قابانباي باتىر كوشەسىنىڭ قيىلىسىنا قويىلدى.
ەسكەرتكىشتىڭ اشىلۋىنا وراي قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قۇتتىقتاۋ حات جولدادى. حاتتى سالتاناتتى شارادا وبلىس اكىمى نۇرلان ۇرانحاەۆ وقىپ بەردى.
شاكارىم قۇدايبەردىۇلىنىڭ ادەبي مۇراسى اسا باي. ول پوەزيا، پروزا، اۋدارما، تاريح سالاسىندا جۇمىس ىستەپ، اباي داستۇرىندە دەموكراتتىق-حالىقتىق، گۋمانيستىك-حالىقتىق باعىت ۇستانعان. ونىڭ شىعارماشىلىعى قازاق ادەبيەتىندە اباي يدەيالارىن جالعاستىرۋشى رەاليستىك ءداستۇردى قالىپتاستىردى. ونىڭ مۇراسىنىڭ تەك قازاق حالقى ءۇشىن عانا ەمەس، بۇكىل تۇركى جانە شىعىس مادەنيەتى ءۇشىن ماڭىزى زور.
ەسكەرتكىشتىڭ اشىلۋ سالتاناتىنىڭ تاۋەلسىزدىك كۇنى قارساڭىندا ءوتۋىنىڭ سيمۆولدىق ءمانى بار. ويتكەنى شاكارىمنىڭ رۋحاني مۇراسى ازاتتىق پەن تاۋەلسىزدىك تاقىرىبىمەن ۇندەس.
