قازاقستان ەكونوميكاسى 2025 جىلدى ايتارلىقتاي وسىممەن قورىتىندىلادى. قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ جەدەل دەرەكتەرىنە سايكەس، ەلدىڭ جالپى ىشكى ءونىمى ء(جىو) 2024 جىلمەن سالىستىرعاندا 106,5%-دى قۇرادى. بۇل – سوڭعى جىلدارداعى ەڭ جوعارى ديناميكانىڭ ءبىرى.
2025 جىلدىڭ باستى «درايۆەرى» — كولىك جانە قويمالاۋ سالاسى بولدى. بۇل سەكتور ءبىر جىلدا 20,4%-عا ءوسىپ، رەكورد ورناتتى. بۇل كورسەتكىش قازاقستاننىڭ ترانزيتتىك حاب رەتىندەگى ءرولىنىڭ كۇشەيگەنىن جانە جۇك اينالىمىنىڭ جاھاندىق دەڭگەيدە جاندانعانىن كورسەتەدى.
ەكىنشى ورىندا — قۇرىلىس سالاسى (+15,9%). ەلدەگى اۋقىمدى ينفراقۇرىلىمدىق جوبالار مەن تۇرعىن ءۇي قۇرىلىسىنىڭ قارقىنى بۇل سەكتوردىڭ وسىمىنە تىكەلەي اسەر ەتتى.
جاڭا ونەركاسىپتىك ساياسات اياسىندا وڭدەۋ سەكتورىنىڭ 6,4%-عا ارتۋى ماڭىزدى جەتىستىك دەپ تانىلدى. بۇل تەك شيكىزات ەكسپورتىنا عانا ەمەس، دايىن ءونىم شىعارۋعا باعىتتالعان مەملەكەتتىك باعدارلامالاردىڭ ناتيجەسى. اسىرەسە، ماشينا جاساۋ جانە مەتاللۋرگيا سالالارىنداعى قوسىلعان قۇنى جوعارى ونىمدەردىڭ ۇلەسى ارتقان.
«بۇل كورسەتكىشتەر ەكونوميكانىڭ سىرتقى سىن-قاتەرلەرگە توزىمدىلىگىن جانە ىشكى رەسۋرستاردىڭ ءتيىمدى پايدالانىلىپ جاتقانىن بىلدىرەدى. 6,5%-دىق ءوسىم — بۇل تەك تسيفر ەمەس، جاڭا جۇمىس ورىندارى مەن حالىقتىڭ ءال-اۋقاتىنىڭ ارتۋىنا نەگىز بولاتىن ناقتى ناتيجە»، – دەيدى ەكونوميست ماماندار.
2025 جىلدىڭ قورىتىندىسى قازاقستاننىڭ ەكونوميكالىق مودەلىنىڭ ترانسفورماتسيالانۋ كەزەڭىندە ەكەنىن كورسەتتى. ترانزيتتىك الەۋەتتىڭ ارتۋى جانە وڭدەۋ ونەركاسىبىنىڭ تۇراقتى ءوسىمى الداعى 2026 جىلى دا وڭ ديناميكانى ساقتاپ قالۋعا مۇمكىندىك بەرەدى.
