بەلگىلى بلوگەر ساليم ايلازوۆ قازاقستانداعى ساپارى كەزىندە قازاق حالقىنىڭ قوناقجايلىعىنا ەرەكشە العىس بىلدىرگەن، دەپ حابارلايدى “ادىرنا” ۇلتتىق پورتالى.
ول الەۋمەتتىك جەلىدەگى پاراقشاسىندا جول ۇستىندە كولىگىنە جانارماي تاۋسىلىپ، قيىن جاعدايعا تاپ بولعانىن ايتقان. الايدا، ءدال وسى ساتتە وعان كومەكتەسكەن قازاق ازاماتتارىنىڭ جاناشىرلىعى مەن مەيىرىمى ەرەكشە اسەر ەتىپتى.
«جولدا جانارمايىم تاۋسىلىپ تۇرىپ قالدىم. قازاقتار ءوز كولىكتەرىنەن جانارماي قۇيىپ بەردى. ول ول ما، اسحاناعا اپارىپ، كۇشتەپ تاماق ىشكىزدى. ءنومىرىمدى الىپ، قوناققا شاقىردى. مەن بۇل نارسەگە شىداي المايمىن، مەنى تاماقتاندىرا بەرۋدى دوعارىڭدارشى، مەن شارشادىم»، – دەيدى ول ازىلمەن.
بلوگەر ايلازوۆتىڭ ايتۋىنشا، كەرى جولعا شىعاتىن كەزدە قازاق جىگىتتەرى كولىگىن اۆتوجۋ ورتالىعىنا اپارىپ، تەگىن جۋعىزىپ بەرگەن. بۇدان بولەك، استاناداعى كۇرد دوستارىمەن دە كەزدەسۋ ۇيىمداستىرعان.
«جالعىز كەلىپ ەدىم، قايتاردا 55 دوس تاپتىم. قازاقتار، قويىڭدارشى، بولدى عوي. ادامدى كۇشتەپ قوناققا شاقىرۋعا بولا ما ەكەن؟ قازاقتار، باۋىرلارىم، بارىڭە شىن ريزامىن. بىرىگىپ قازاقشا كونتەنت جاسايمىز. مادەنيەتىمىزدى، يدەولوگيامىزدى بىرگە ناسيحاتتايىق»، – دەپ تۇيىندەدى بلوگەر.
ول ءوزىنىڭ الەۋمەتتىك جەلىدەگى ۇندەۋ ۆيدەوسىنىڭ استىنا جازبا قالدىرعان.
«انام – قازاقستان، اكەم – كۇردستان»، - دەپ جازدى بلوگەر.