فوتو: Global Look Press
گەرمانيا ۇكىمەتى ەل ەكونوميكاسىن ءىشىنارا اسكەري باعىتقا قايتا بەيىمدەۋگە دايىندالىپ جاتىر. بۇل قادام اۆتوموبيل ونەركاسىبىندەگى ۇزاققا سوزىلعان قۇلدىراۋ اياسىندا قولعا الىنۋدا. بۇل تۋرالى The Wall Street Journal باسىلىمى جازدى، دەپ حابارلايدى "ادىرنا".
سالا وكىلدەرىنىڭ مالىمەتىنشە، ەكىنشى دۇنيەجۇزىلىك سوعىستان بەرگى ەڭ ۇزاق توقىراۋ كەزەڭىن باستان وتكەرىپ وتىرعان گەرمانيانىڭ اۆتونارىعى وندىرىستىك قۋاتتاردى اسكەري ءونىم شىعارۋعا باعىتتاۋعا ءماجبۇر. اتاپ ايتقاندا، Mercedes-Benz, BMW, MAN جانە Volkswagen زاۋىتتارىنىڭ ءبىر بولىگى قورعانىس سالاسىنا قاجەت ونىمدەر وندىرۋگە بەيىمدەلۋى مۇمكىن.
ماسەلەن، Volkswagen اۋە شابۋىلىنا قارسى «تەمىر كۇمبەز» جۇيەسىنە ارنالعان كومپونەنتتەر شىعارۋدى جوسپارلاپ وتىر. ال اۆتوكولىك بولشەكتەرىن ءوندىرۋشى Schaeffler كومپانياسى دروندارعا ارنالعان قوزعالتقىشتار، بروندى تەحنيكالارعا ارنالعان بورتتىق جۇيەلەر جانە اسكەري ۇشاقتارعا قاجەتتى بولشەكتەر ءوندىرىسىن باستاعان. كەيبىر كاسىپورىنداردا قارۋ-جاراق پەن وق-ءدارى ءوندىرۋ ءۇشىن ءۇشىنشى اۋىسىم ەنگىزىلگەن. سونىمەن قاتار، Patriot زىمىرانعا قارسى جۇيەلەرىن گەرمانيا اۋماعىندا شىعارۋ جوسپارى بار.
ساراپشىلاردىڭ ايتۋىنشا، گەرمانيانىڭ قارۋ-جاراق ەكسپورتىنىڭ شامامەن تورتتەن ءبىرى ۋكرايناعا باعىتتالىپ وتىر. بۇل ەۋروپاداعى قاۋىپسىزدىك احۋالى مەن گەوساياسي وزگەرىستەردىڭ قورعانىس ونەركاسىبىنە تىكەلەي اسەر ەتىپ وتىرعانىن كورسەتەدى.
ايتا كەتۋ كەرەك، بۇل ءۇردىس تەك گەرمانيامەن شەكتەلمەيدى. Rheinmetall سەكىلدى ءىرى ترانسۇلتتىق كورپوراتسيالار ەۋروپا بويىنشا وندىرىستىك اۋقىمىن كەڭەيتىپ، قورعانىس ونىمدەرىن شىعارۋدى ۇلعايتىپ كەلەدى.
.
