زاڭگەر ءارى قازاقتىڭ اياۋلى اقىن قىزى الما تۇسىپبەكوۆا قازاق تىلىنە دەگەن مەملەكەتتىك بيلىكتىڭ قارىم-قاتىناسىن اشىپ جازىپ، اقيقاتىن ايتتى. ونىڭ ايتۋىنشا، انا ءتىلىن بىلمەۋ ەشكىمدى تاعىنان تايدىرا قويمايدى، ءتىپتى، ۇيرەنۋگە جوعارىداعىڭ قۇلقى دا جوق، دەپ حابارلايدى "ادىرنا" ۇلتتىق پورتالى.
ولەڭدى ومىرىنە سەرىك ەتكەن قازاقتىڭ وجەت قىزى، زاڭگەر الما تۇسىپبەكوۆا قوعامداعى قازاق ءتىلىنىڭ قولدانىسىنا قاتىستى شىندىقتى اشىپ ايتتى:
- ءبىر اۋىز قازاق ءتىلىن بىلمەيتىن شەنەۋىكتەر ۇلكەن لاۋازىمدا وتىر. وتىز جىلدا بىرنەشە ءتىل ۇيرەنۋگە بولادى. بىراق ولاردا قۇلىق جوق. سەبەبى ءتىل بىلمەۋ - لاۋازىم تاعىنا كەدەرگى كەلتىرمەيدى. بۇل دەگەنىمىز - مەملەكەتتىك بيلىكتە قازاق تىلگە دەگەن سۇرانىس جوق. بۇدان شىعاتىن قورىتىندى ءتىل بىلمەۋ بيلىكتىڭ ءۇش تارماعىنا دا سۇرانىس تۋدىرمايدى.
الايدا ولار ءوزى قازاق ءتىلىن بىلمەسە ءوز قىزمەتكەرلەرىنەن قالاي تالاپ ەتەدى؟ ەكىنشىدەن، پارلامەنت ءالى كۇنگە دەيىن زاڭنامانى ورىس تىلىندە قابىلدايدى. ءالى كۇنگە دەيىن قازاق تىلىندە اۋدارىلعان زاڭ نورمالارىندا قاتەلىكتەر مەن كەمشىلىكتەر جەتىپ ارتىلادى...ماسەلەن زاڭ تىلىندەگى تەرميننىڭ ءبىر اتاۋى كەز-كەلگەن نورماتيۆتىك-قۇقىقتىق اكتىلەردە ءارتۇرلى قولدانىلادى. ءالى كۇنگە دەيىن زاڭنامادا بىرىزدىلىك جوق...اينالىپ كەلگەندە ءبىز ءوز جەرىمىزدە، ءوز ەلىمىزدە وتىرىپ وسىنداي سورلى كۇيگە جەتتىك. ءالى كۇنگە دەيىن بىزدە جالتاقتىق باسىم...
ۇشىنشىدەن، مەملەكەتتىك قىزمەتتە ءالى كۇنگە دەيىن اۋدارما ءتىل دەگەن بار. وسى اۋدارما بۇكىل جۇيەنىڭ ءتۇپ-تامىرىن ءشىرىتىپ وتىر... بار ماسەلەنىڭ ءتۇيىنى وسىندا جاتىر...سوندىقتان اۋدارما ءتىلىن قۇردىمعا جىبەرۋ قاجەت.
نەسىن جاسىرامىز مەملەكەتتەگى ەڭ ءبىرىنشى ادام - توقاەۆتىڭ ءوزى انا تىلىندە دۇرىس سويلەي المايدى عوي. پرەزيدەنت ەڭ ءبىرىنشى حالىققا ءوزى ۇلگى تۇلعا بولۋى كەرەك!ال بىزدە ءبارى كەرىسىنشە... - دەدى زاڭگەر.
بۇعان قاتىستى:
"مەملەكەتتىك قىزمەتتە مەملەكەتتىك ءتىلدى بىلۋگە دەگەن قاجەتتىلىك جوق. سولاي بولماعان سوڭ ەشتەڭە وزگەرمەي وتىر. مەملەكەتتىك قىزمەتكە مەملەكەتتىك ءتىلدى مۇلتىكسىز بىلەتىن جانە ساۋاتتى جازا الاتىن ادام عانا قابىلدانۋى كەرەك. وسىنداي تالاپ بولماي وتىر..." دەپ پىكىر ءبىلدىردى وقىرماندار.
"ادىرنا" ۇلتتىق پورتالى
