Қазақстан экономикасы 2025 жылды айтарлықтай өсіммен қорытындылады. ҚР Стратегиялық жоспарлау және реформалар агенттігі Ұлттық статистика бюросының жедел деректеріне сәйкес, елдің Жалпы ішкі өнімі (ЖІӨ) 2024 жылмен салыстырғанда 106,5%-ды құрады. Бұл – соңғы жылдардағы ең жоғары динамиканың бірі.
2025 жылдың басты «драйвері» — көлік және қоймалау саласы болды. Бұл сектор бір жылда 20,4%-ға өсіп, рекорд орнатты. Бұл көрсеткіш Қазақстанның транзиттік хаб ретіндегі рөлінің күшейгенін және жүк айналымының жаһандық деңгейде жанданғанын көрсетеді.
Екінші орында — құрылыс саласы (+15,9%). Елдегі ауқымды инфрақұрылымдық жобалар мен тұрғын үй құрылысының қарқыны бұл сектордың өсіміне тікелей әсер етті.
Жаңа өнеркәсіптік саясат аясында өңдеу секторының 6,4%-ға артуы маңызды жетістік деп танылды. Бұл тек шикізат экспортына ғана емес, дайын өнім шығаруға бағытталған мемлекеттік бағдарламалардың нәтижесі. Әсіресе, машина жасау және металлургия салаларындағы қосылған құны жоғары өнімдердің үлесі артқан.
«Бұл көрсеткіштер экономиканың сыртқы сын-қатерлерге төзімділігін және ішкі ресурстардың тиімді пайдаланылып жатқанын білдіреді. 6,5%-дық өсім — бұл тек цифр емес, жаңа жұмыс орындары мен халықтың әл-ауқатының артуына негіз болатын нақты нәтиже», – дейді экономист мамандар.
2025 жылдың қорытындысы Қазақстанның экономикалық моделінің трансформациялану кезеңінде екенін көрсетті. Транзиттік әлеуеттің артуы және өңдеу өнеркәсібінің тұрақты өсімі алдағы 2026 жылы да оң динамиканы сақтап қалуға мүмкіндік береді.
