سوت شىعىس قازاقستان وبلىسىنىڭ بۇرىنعى ءبىرىنشى ورىنباسارى جاقسىلىق وماردى ءىرى كولەمدە الاياقتىق جاساۋ جانە پارا الۋ بويىنشا كىنالى دەپ تانىپ، وعان 6 جىلعا تۇرمە جازاسىن تاعايىندادى، دەپ حابارلايدى "ادىرنا".
بۇگىنگى سوتتا سوڭعى سوزىندە جاقسىلىق ومار اقشا بوپسالاعانىن جوققا شىعارىپ، سوتتان قورعاۋشىلارى ايتقان جەڭىلدەتەتىن جايتتاردى ەسكەرۋدى سۇرادى.
«مەن اقشا بوپسالاعان جوقپىن. سوتتان قورعاۋشىلارىم ايتقان جاعدايلاردى جەڭىلدەتەتىن جايت رەتىندە قابىلداۋىن سۇرايمىن»، - دەدى ول.
بۇعان قوسا، بۇرىنعى اكىم سوتتان ءوزىن تۇرمەگە جىبەرمەۋدى ءوتىندى.
«مەن مەملەكەتكە ماسىل بولعىم كەلمەيدى، كەرىسىنشە، ءوز ۇلەسىمدى قوسقىم كەلەدى. قارىزعا باتسام دا، ايىپپۇلدى تولەيمىن. تۇسىنىستىك تانىتاسىزدار دەپ ۇمىتتەنەمىن»، - دەدى ول.
الايدا، سوتوعان 6 جىل باس بوستاندىعىنان ايىرۋ، Toyota Camry 75 اۆتوكولىگىن تاركىلەۋ جانە مەملەكەتتىك قىزمەتتە ءومىر بويى جۇمىس ىستەۋگە تىيىم سالۋ تۇرىندەگى جازا تاعايىندالدى.
سوت ماتەريالدارىنا سايكەس، وعان قىلمىستىق كودەكستىڭ 190-بابى 3-ءبولىمىنىڭ 1 جانە 2-تارماقتارى ء(ىرى كولەمدە الاياقتىق جاساۋ) جانە 366-بابى 3-ءبولىمىنىڭ 3-تارماعى ء(ىرى كولەمدە پارا الۋ) بويىنشا قىلمىستىق قۇقىق بۇزۋشىلىقتار جاسادى دەگەن ايىپ تاعىلعان.
