اقتوبەدە بوكەنباي باتىر كوشەسىندە جاڭادان اشىلعان «انۆار» گيپەرماركەتىنىڭ الدىندا رەفەرەندۋمدى قولداۋعا ارنالعان جاستار فەستيۆالى ۇيىمداستىرىلدى.
اشىق اسپان استىندا وتكەن مەرەكەلىك كەش قالا تۇرعىندارىنا ساياسي ناۋقان اياسىنداعى اقپاراتتىق-ءتۇسىندىرۋ جۇمىستارىن جالعاستىرۋعا مۇمكىندىك بەردى.
ءىس-شارانى قالا جاستارى ۇيىمداستىردى. ساحنادا وقۋ ورىندارىنىڭ ستۋدەنتتەرى مەن ونەر ۇجىمدارى ونەر كورسەتتى. جينالعان قاۋىمعا وبلىستىق كواليتسيا مۇشەلەرى جاڭا كونستيتۋتسيا جوباسىنىڭ نەگىزگى باعىتتارىن ءتۇسىندىرىپ، 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسۋعا شاقىردى.
وبلىستىق ءماسليحات دەپۋتاتى ايگۇل نۇركەەۆا رەفەرەندۋمدى تاريحي كەزەڭ دەپ اتادى. ونىڭ ايتۋىنشا، كونستيتۋتسيا – مەملەكەتتىڭ تىرەگى ءارى بولاشاق ۇرپاقتىڭ تاعدىرىنا تىكەلەي اسەر ەتەتىن باستى قۇجات.
ء«بىز بۇگىن تاريحي كەزەڭنىڭ كۋاسى بولىپ تۇرمىز. كونستيتۋتسيا — مەملەكەتىمىزدىڭ تىرەگى، بولاشاق ۇرپاقتىڭ تاعدىرىنا تىكەلەي اسەر ەتەتىن باستى قۇجات. قابىلداناتىن وزگەرىستەر ادىلەتتى، پروگرەسسيۆتى قازاقستاندى قالىپتاستىرۋعا باعىتتالعان. بارشاڭىزدى رەفەرەندۋمعا كەلىپ، داۋىس بەرۋگە شاقىرامىن. بولاشاعىمىز ءۇشىن بىرگە شەشىم قابىلدايىق!»، — دەدى وبلىستىق ءماسليحات دەپۋتاتى ايگۇل نۇركەەۆا.
«جاستار رۋحى» جاستار قاناتى وبلىستىق فيليالىنىڭ توراعاسى الىشەر تىنىشتىق ەلدەگى تۇراقتىلىق پەن رەفورمالاردىڭ ماڭىزىنا توقتالدى.
«بۇل وزگەرىستەر — پرەزيدەنت قاسىم-جومارت توقاەۆتىڭ ادىلەتتى قوعام قۇرۋعا جانە جاستاردى قولداۋعا باعىتتالعان ساياساتىنىڭ ناتيجەسى. جاڭا كونستيتۋتسيا — جاي قۇجات ەمەس، بىلىمگە، عىلىمعا جانە يننوۆاتسياعا جول اشاتىن ماڭىزدى باستاما. بۇل — ءار جاسقا بەرىلگەن ناقتى مۇمكىندىك. رەفەرەندۋم — “مەن ەلىممەن بىرگەمىن!” دەپ ايتاتىن شەشۋشى ءسات. 15 ناۋرىز — ءار ازامات داۋىس بەرۋ ارقىلى ەل تاريحىن ايقىندايتىن كۇن. ءبىز تاڭداۋ جاساپ، بولاشاقتى بىرگە قۇرامىز!»، — دەدى ول.
سونداي-اق «انۆار» ساۋدا جەلىسىنىڭ ديرەكتورى اسلان قايىرعاليەۆ تە ءوز پىكىرىن ءبىلدىردى. ونىڭ ايتۋىنشا، جاڭا جوبا اياسىندا ازاماتتاردىڭ قۇقىقتارى مەن بوستاندىقتارى، ەڭبەك قۇقىقتارى كونستيتۋتسيالىق دەڭگەيدە بەكىتىلەدى.
«قالامىزدا ىرگەلى نىسانداردىڭ بوي كوتەرۋى پرەزيدەنتتىڭ كاسىپكەرلىكتى قولداۋ ساياساتىنىڭ تىكەلەي جەمىسى دەپ ايتا الامىن. ءار ادامنىڭ قۇقىعى مەن بوستاندىعى مەملەكەتتىڭ باستى باسىمدىعى رەتىندە ايقىندالىپ وتىر. ءار ازامات ساپالى ەڭبەك ەتىپ، ءوزى قالاعان كاسىپ تۇرىمەن اينالىسۋعا قۇقىلى. ەلدىك مۇددە مەن جارقىن بولاشاق ءۇشىن بارشا اقتوبەلىكتى جاڭا كونستيتۋتسيانى قولداۋعا شاقىرامىن! ەلىمىز امان، كاسىبىمىز بەرەكەلى بولسىن!»، — دەدى اسلان قايىرعاليەۆ.
ايتا كەتەيىك، رەسپۋبليكالىق رەفەرەندۋم 15 ناۋرىزدا وتەدى.
