اقتوبە گارنيزونىنىڭ اسكەري سوتى باتىس قازاقستان وبلىسىنداعى «تاسمولا» شەكارا بولىمشەسىنىڭ باستىعى سۇلتان قوناروۆقا قاتىستى قىلمىستىق ءىستى قارادى. ول قىزمەتتىك وكىلەتىن اسىرا پايدالاندى دەپ ايىپتالدى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
تەرگەۋ ماتەريالدارىنا سايكەس، بولىمشە باسشىسى كەلىسىمشارتپەن قىزمەت ەتەتىن اسكەري قىزمەتكەرلەردەن شەكارا بولىمشەسىن جوندەۋگە قاجەت دەگەن سىلتاۋمەن 15 مىڭ تەڭگەدەن اقشا جيناۋدى تاپسىرعان. جينالعان قاراجات ساربازداردىڭ ءبىرىنىڭ ەسەپشوتىنا اۋدارىلىپ وتىرعان. وسىلايشا اسكەري جارعى مەن ىشكى ءتارتىپ تالاپتارى بۇزىلعان.
سوت مالىمەتىنشە، 20-عا جۋىق اسكەري قىزمەتكەر اقشا اۋدارعان. كەيىن جينالعان قارجىنىڭ ءبىر بولىگى قوناروۆتىڭ جەكە قاجەتتىلىكتەرىنە جۇمسالعان: ول قارىزىن وتەپ، دۇكەندەردەن تۇرمىستىق زاتتار ساتىپ العان، سونداي-اق ءمودۋلدى ۇيىنە پلاستيكالىق تەرەزە ورناتۋعا تاپسىرىس بەرگەن. بۇدان بولەك، 60 مىڭ تەڭگەنى قولما-قول العانى انىقتالدى.
سوت بارىسىندا ونىڭ ەڭبەك دەمالىسىنا شىققان قىزمەتكەرلەردەن دە ءتۇرلى زاتتار الىپ بەرۋدى سۇراعانى بەلگىلى بولدى. اسكەري قىزمەتكەرلەر اياق كيىم مەن سومكە ساتىپ اپەرىپ، كەي جاعدايدا دۇكەندەردەگى قارىزدارىن جاپقان. كەيبىر قارجى سوتتالۋشىنىڭ ايەلىنىڭ ەسەپشوتىنا اۋدارىلعان. تەرگەۋ دەرەگىنشە، باستاپقىدا 15 مىڭ تەڭگەدەن باستالعان اقشا جيناۋ كولەمى كەيىن 100–150 مىڭ تەڭگەگە دەيىن وسكەن.
الايدا سۇلتان قوناروۆ سوتتا ءوز كىناسىن مويىنداماي، بۇل ارەكەتتەردى بولىمشەدە ۋاقىتشا مىندەت اتقارعان باسقا اسكەري قىزمەتكەر ۇيىمداستىرعانىن مالىمدەدى.
سوت ۇكىمىمەن قوناروۆ كىنالى دەپ تانىلىپ، 6 جىلعا باس بوستاندىعىنان ايىرىلدى. سونىمەن قاتار وعان ءومىر بويى اسكەري جانە مەملەكەتتىك قىزمەتتە جۇمىس ىستەۋگە تىيىم سالىندى. جازاسىن ورتاشا قاۋىپسىزدىك مەكەمەسىندە وتەيدى. جابىرلەنۋشىلەردىڭ ازاماتتىق تالاپتارى تولىق قاناعاتتاندىرىلدى.
ەسكە سالا كەتەيىك، بۇعان دەيىن اقتوبەدە كۋرسانتتىڭ ولىمىنەن كەيىن ەكى اسكەري قىزمەتكەر دە سوتتالعان بولاتىن.
