قاۋىپسىز قوعام — ورتاق جاۋاپكەرشىلىك

اقتوبەدە «جاستار جانە قاۋىپسىز قوعام» تاقىرىبىندا جاستارمەن كەزدەسۋ ءوتتى. «زاڭ مەن ءتارتىپ» يدەولوگياسى اياسىندا ۇيىمداستىرىلعان شارانىڭ ماقساتى — جاستاردىڭ قۇقىقتىق مادەنيەتىن قالىپتاستىرۋ، قۇقىقبۇزۋشىلىقتىڭ الدىن الۋ جانە قاۋىپسىز قوعام قۇرۋداعى جاۋاپكەرشىلىگىن ارتتىرۋ.
 
كەزدەسۋدە وبلىستىق پوليتسيا دەپارتامەنتىنىڭ كيبەرقىلمىسقا قارسى ءىس-قيمىل باسقارماسىنىڭ وكىلى بەرىك بورانباەۆ ينتەرنەت-الاياقتىقتىڭ كەڭ تاراعان تاسىلدەرى مەن ونىڭ زارداپتارى تۋرالى ايتتى. ونىڭ سوزىنشە، الاياقتار الەۋمەتتىك جەلىلەردە بەينەروليكتەردى كورىپ، ولارعا ءلۇپىل باسۋ نەمەسە تەلەفون نومىرلەرىن تىركەۋ ارقىلى وڭاي تابىس تابۋعا ۋادە بەرەدى. الايدا مۇنداي ۇسىنىستاردىڭ ارتىندا ازاماتتاردىڭ جەكە دەرەكتەرىن يەمدەنۋ جانە ولاردى قىلمىستىق ارەكەتتەرگە تارتۋ قاۋپى بار.
 
سپيكەر جاستارعا بانك كارتالارى مەن شوتتارىن بوگدە ادامدارعا بەرمەۋدى، كۇماندى ۇسىنىستارعا سەنبەۋدى ەسكەرتتى. اسىرەسە دروپپەرلىك ارەكەتتەرگە قاتىسۋ ازاماتتى زاڭ الدىندا جاۋاپكەرشىلىككە تارتۋى مۇمكىن ەكەنىن ءتۇسىندىردى. مۇنداي جاعدايلاردا ادام وزگەنىڭ زاڭسىز قارجى وپەراتسيالارىنا قاتىسىپ قانا قويماي، كەلتىرىلگەن شىعىندى وتەۋگە دە مىندەتتەلۋى ىقتيمال.
 
سونداي-اق كەزدەسۋدە سپورتتىڭ جاستار تاربيەسىندەگى ءرولى دە ءسوز بولدى. جوعارعى سپورت شەبەرلىگى مەكتەبىنىڭ ديرەكتورى، قازاقستان رەسپۋبليكاسىنىڭ ەڭبەك سىڭىرگەن سپورت شەبەرى رۋسلان ىبىراەۆ سپورت ادامنىڭ بويىندا ءتارتىپتى، تاباندىلىقتى جانە ماقساتقا ۇمتىلۋدى قالىپتاستىراتىنىن اتاپ ءوتتى.
 
ونىڭ ايتۋىنشا، سپورتپەن جۇيەلى اينالىسۋ جاستاردىڭ بوس ۋاقىتىن ءتيىمدى ۇيىمداستىرۋعا، تەرىس ادەتتەردەن اۋلاق بولۋعا جانە ومىرلىك ماقساتىن ايقىنداۋعا كومەكتەسەدى. سپورتتىق جەتىستىكتەرگە جەتۋ ءۇشىن كۇن ءتارتىبىن ساقتاپ، جاتتىعۋ مەن وقۋدى قاتار الىپ ءجۇرۋ قاجەت.
 
باسقوسۋ بارىسىندا وزگە دە سپيكەرلەر جاستاردىڭ قۇقىقتىق ساۋاتىن ارتتىرۋ، قارجىلىق قاۋىپسىزدىك جانە قوعام الدىنداعى جاۋاپكەرشىلىك ماسەلەلەرىنە توقتالدى. قاتىسۋشىلار وزدەرىن تولعاندىرعان ساۋالدارىن قويىپ، مامانداردان جاۋاپ الدى.