بۇگىن اقتوبە وبلىسىنىڭ اكىمى اسحات شاحاروۆ جاڭا كونستيتۋتسيا جوباسى بويىنشا وتكىزىلگەن رەسپۋبليكالىق رەفەرەندۋمعا قاتىسىپ، ءوز تاڭداۋىن جاسادى.
ءوڭىر باسشىسى №541 رەفەرەندۋم ۋچاسكەسىندە داۋىس بەردى. اتالعان ۋچاسكە ۇزاقباي قۇلىمبەتوۆ اتىنداعى №64 جالپى ءبىلىم بەرەتىن مەكتەپتە ورنالاسقان.
داۋىس بەرگەننەن كەيىن وبلىس اكىمى رەفەرەندۋمعا قاتىسۋدىڭ ماڭىزدىلىعىن اتاپ ءوتتى.
«بۇگىن مەن رەفەرەندۋم ۋچاسكەسىنە كەلىپ، ەلىمىزدىڭ جارقىن بولاشاعى ءۇشىن ءوز تاڭداۋىمدى جاسادىم. بۇل – تەك ءبىزدىڭ قۇقىعىمىز عانا ەمەس، ءاربىر ازاماتتىڭ وتان الدىنداعى مىندەتى. كونستيتۋتسيا – تاۋەلسىز قازاقستاننىڭ باستى قۇجاتى، مەملەكەتىمىزدىڭ بەرىك نەگىزى»، – دەدى وبلىس اكىمى.
سونداي-اق ول اقتوبە وبلىسىندا رەفەرەندۋمدى وتكىزۋ ءۇشىن بارلىق قاجەتتى جاعداي جاسالعانىن العا تارتتى. وڭىردە 528 داۋىس بەرۋ ۋچاسكەسى جۇمىس ىستەپ تۇر. ولاردىڭ بارلىعى قاجەتتى جابدىقتارمەن تولىق قامتاماسىز ەتىلگەن.
ۋچاسكەلەردە داۋىس بەرۋ پروتسەسىنىڭ اشىق ءارى زاڭ تالاپتارىنا سايكەس ءوتۋى ءۇشىن بارلىق مۇمكىندىك قاراستىرىلعان.
قازىرگى ۋاقىتتا رەسپۋبليكالىق رەفەرەندۋم اقتوبە وبلىسىنىڭ اۋماعىندا جالعاسىپ جاتىر. ءاربىر تۇرعىن ەل بولاشاعىنا قاتىستى ءوز پىكىرىن ءبىلدىرىپ، تاڭداۋ جاساۋعا مۇمكىندىك الدى.
