قازنەتتە وليگارح الەكساندر ماشكەۆيچ پەن اقتوبە وبلىسىنىڭ اكىمى ەرالى توعجانوۆتىڭ قۇشاقتاسىپ كەلە جاتقان ۆيدەوسى كەڭ تاراپ كەتتى، دەپ جازادى "ادىرنا" ۇلتتىق پورتالى.
جەلىنى شۋلاتقان ۆيدەو اقتوبە قالاسىندا تۇسىرىلگەنى بەلگىلى بولدى.
اقتوبە وبلىسى اكىمدىگىنىڭ حابارلاۋىنشا، 8 قاراشادا اقتوبەدەگى جەڭىس اللەياسى قايتا جوندەلىپ، حالىق يگىلىگىنە بەرىلگەن.
"سالتاناتتى شاراعا وبلىس اكىمى ەرالى توعجانوۆ، ERG ديرەكتورلار كەڭەسىنىڭ توراعاسى الەكساندر ماشكەۆيچ، ارداگەرلەر مەن ىقشاماۋداننىڭ تۇرعىندارى قاتىستى. اقتوبە وبلىسى اكىمدىگى مەن ERG اراسىنداعى ءوزارا ىنتىماقتاستىق تۋرالى مەموراندۋم اياسىندا جەڭىس اللەياسىن جوندەۋگە 90 ميلليون تەڭگەدەن استام قارجى ءبولىندى", - دەلىنگەن رەسمي حابارلامادا.
توعجانوۆ شارا بارىسىندا "وبلىستىڭ گۇلدەنۋىنە قوسقان ۇلەسى ءۇشىن" ماشكەۆيچكە العىس ايتتى.
«بۇل — ءبىزدىڭ وڭىردە جۇزەگە اسىرىلىپ جاتقان جانە الداعى ۋاقىتتا ERG كومپانياسىمەن بىرلەسىپ اتقارۋدى جوسپارلاپ وتىرعان ءىرى جوبالاردىڭ ءبىر بولىگى عانا. مەن وبلىستىڭ گۇلدەنۋىنە قوسقان ۇلەسى ءۇشىن الەكساندر ماشكەۆيچكە جانە كومپانيانىڭ اقتوبەدەگى كاسىپورىندارىنىڭ بارلىق قىزمەتكەرلەرىنە العىس ايتامىن. ءوڭىر تۇرعىندارىنا جايلى دەمالىس ورىندارىن قۇرۋ، قالانى اباتتاندىرۋ جۇمىستارى جالعاسا بەرەدى»، — دەدى توعجانوۆ.
ماشكەۆيچ بولسا اقتوبە وبلىسىنا ءدال توعجانوۆتىڭ كەلگەنىنە قۋانىشتى ەكەنىن جەتكىزدى.
«اقتوبە وبلىسىنىڭ اكىمى بولىپ ەرالى توعجانوۆتىڭ تاعايىندالعانىنا قۋانىشتىمىز. الداعى ۋاقىتتا ءوڭىردىڭ الەۋمەتتىك دامۋى، حالىقتىڭ ءومىر ءسۇرۋ ساپاسىن ارتتىرۋداعى ىنتىماقتاستىعىمىز جەمىستى بولاتىنىنا سەنىمدىمىن. قالاداعى ىقشاماۋداندى جاڭارتۋ مەن تۇرلەندىرۋ باعىتىنداعى جۇمىستارىمىز مۇنىمەن اياقتالماعانىن جەتكىزگىم كەلەدى»، — دەدى الەكساندر ماشكەۆيچ.
