اقتوبەدە قازاقتىڭ كورنەكتى اقىنى، كومپوزيتورى ءارى دراماتۋرگى باكىر تاجىباەۆتىڭ تۋعانىنا 100 جىل تولۋىنا وراي بىرقاتار مادەني ءىس-شارا ءوتتى.
مەرەيتويلىق شارالار مەملەكەت باسشىسى قاسىم-جومارت توقاەۆتىڭ ۇلتتىق مادەنيەت پەن رۋحانياتقا ۇلەس قوسقان تۇلعالاردىڭ مۇراسىن ساقتاۋ جانە دارىپتەۋ جونىندەگى ۇستانىمىمەن ۇندەسەدى. باكىر تاجىباەۆتىڭ شىعارماشىلىعى قازاق ونەرىنىڭ دامۋىنا ۇلەس قوسىپ، حالىقتىڭ رۋحاني قازىناسىنا اينالدى.
عاسىرلىق مەرەيتوي وبلىس اكىمى اسحات شاحاروۆتىڭ اقىننىڭ ۇرپاقتارىن قابىلداۋىنان باستالدى. كەزدەسۋدە ءوڭىر باسشىسى قالامگەردىڭ ولەڭدەرى، اندەرى مەن درامالىق شىعارمالارىنىڭ كەيىنگى بۋىن ءۇشىن ماڭىزى زور ەكەنىن اتاپ ءوتتى. ءوز كەزەگىندە قوناقتار تۇلعا ەسىمىن ۇلىقتاۋعا باعىتتالعان باستامالارعا قولداۋ كورسەتىلگەنى ءۇشىن العىستارىن جەتكىزدى.
شارانىڭ ماڭىزدى وقيعالارىنىڭ ءبىرى – وبلىستىق حالىق شىعارماشىلىعى ورتالىعىنىڭ الدىنداعى الاڭدا باكىر تاجىباەۆتىڭ ەسكەرتكىش-ءبيۋستىنىڭ اشىلۋى. سالتاناتتى راسىمگە وبلىس اكىمى اسحات شاحاروۆ، اقىننىڭ ۇلى جاسۇلان تاجىباەۆ، تۋعان-تۋىستارى، اقىن-جازۋشىلار مەن مادەنيەت جانە ونەر قايراتكەرلەرى قاتىستى.
ەسكەرتكىشتى اشۋ قۇرمەتى قر كومپوزيتورلار وداعىنىڭ توراعاسى سەرىكجان ءابدىنۇروۆ پەن اقىننىڭ تۋىسى اقان تولەۋوۆكە ۇسىنىلدى. شارا بارىسىندا مەرەيتوي يەسىنىڭ اندەرى ورىندالىپ، ەسكەرتكىشكە گۇل شوقتارى قويىلدى. ەسكەرتكىش-ءبيۋستتىڭ اۆتورى – ءمۇسىنشى، مونۋمەنتالدى ونەر شەبەرى بولاتبەك سالاەۆ.
«باكىر اعامىزدىڭ ءومىرى مەن شىعارماشىلىعى اقتوبە وڭىرىمەن بىتە قايناسىپ جاتىر. ول تۋعان جەرىنىڭ تابيعاتىن، ەل تۇرمىسىن، ادام جان دۇنيەسىن شىعارمالارىنا ارقاۋ ەتتى. اقىننىڭ سىرلى جىرلارى مەن اسەم اندەرى بۇگىندە حالقىمىزدىڭ رۋحاني قازىناسىنا اينالدى. بۇل عيمارات – حالىق شىعارماشىلىعىن ناسيحاتتايتىن رۋحاني وردالاردىڭ ءبىرى. مۇندا كەلگەن ءاربىر جان باكىر اعامىزدىڭ بەينەسىنە تاعزىم ەتىپ، ونىڭ ونەرى مەن ونەگەسىنەن رۋحاني ءنار الادى دەپ سەنەمىن»، – دەدى ايماق باسشىسى قۇتتىقتاۋ سوزىندە.
اقىننىڭ ۇلى جاسۇلان تاجىباەۆ ەسكەرتكىشتىڭ اشىلۋى وتباسى ءۇشىن كوپتەن كۇتكەن ارماننىڭ ورىندالۋى ەكەنىن ايتتى. ونىڭ سوزىنشە، بۇل باستاما اناسىنىڭ اماناتى بولعان.
سونداي-اق مەرەيتوي اياسىندا قالامگەردىڭ ءومىرى مەن شىعارماشىلىعىنا ارنالعان «اقبۇلاق اعا» كىتابىنىڭ تانىستىرىلىمى ءوتتى. كىتاپ اۆتورى – مادەنيەت سالاسىنىڭ ۇزدىگى ورال-قوساي بايسەڭگىر. جيناققا اقىننىڭ سەگىز درامالىق شىعارماسى، سونداي-اق اۆتوردىڭ ءوز تۋىندىلارى مەن باكىر تاجىباەۆ تۋرالى جازىلعان پەسالار ەنگىزىلگەن.
مەرەيتوي باعدارلاماسى ت.احتانوۆ اتىنداعى اقتوبە وبلىستىق دراما تەاترىندا «اقبۇلاق اعا» سپەكتاكل-ەلەگياسىنىڭ قويىلىمىمەن جالعاستى. شىعارمادا باكىر تاجىباەۆتىڭ ءومىر جولى، شىعارماشىلىق ىزدەنىستەرى، ازاماتتىق بولمىسى مەن تۋعان جەرىنە دەگەن سۇيىسپەنشىلىگى بەينەلەنگەن.
سپەكتاكلدىڭ اۆتورى – ورال-قوساي بايسەڭگىر. رەجيسسەرلەرى – قازاقستاننىڭ ەڭبەك سىڭىرگەن قايراتكەرى سايلاۋ قاميەۆ پەن اقنيەت جاقسىعالي.
باكىر تاجىباەۆ قازاق پوەزياسى، مۋزىكاسى مەن دراماتۋرگياسىندا وزىندىك قولتاڭباسىن قالدىردى. ونىڭ شىعارمالارىندا تۋعان جەرگە سۇيىسپەنشىلىك، ادامگەرشىلىك، ماحاببات پەن ساعىنىش تاقىرىپتارى كەڭىنەن كورىنىس تاپقان. اقتوبەدە وتكەن مەرەيتوي اقىننىڭ ۇلتتىق مادەنيەتتەگى ورنىن ايقىنداپ، شىعارماشىلىق مۇراسىن جاڭا بۋىنعا تانىتۋعا باعىتتالدى.
