مەملەكەت جانە قوعام قايراتكەرى، قازاقستاننىڭ ەڭبەك ەرى، مەملەكەتتىك سىيلىقتىڭ يەگەرى، قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ ۆيتسە-پرەزيدەنتى، فيزيكا-ماتەماتيكا عىلىمدارىنىڭ دوكتورى، پروفەسسور، اكادەميك، قىزىلوردا وبلىسىنىڭ قۇرمەتتى ازاماتى اسقار سەرقۇلۇلى جۇمادىلداەۆ 70 جاسقا تولدى.
اسقار اعامىزدىڭ ءوز سالاسىندا اشقان جاڭالىقتارى الەمدىك عىلىمي قاۋىمداستىقتان جوعارى باعا العان. عىلىم جولىنداعى ەڭبەكتەرى مەن جەتىستىكتەرى ارقىلى قازاقتىڭ زياتكەر، ءبىلىمدى ۇلت ەكەنىن دۇنيە جۇزىنە تانىتقان.
جەرلەستەرى «تورتكەن» جانە «تورتقارا» الگەبراسىن ويلاپ تاۋىپ، عىلىمعا قازاقشا اتاۋ ەنگىزگەن تۇڭعىش قازاق عالىمىن، سىر پەرزەنتىن ماقتانىش تۇتامىز.
ول جاس ۇرپاققا ماتەماتيكانىڭ قىر-سىرىن ۇيرەتكەن جارتى عاسىرعا جۋىق ۋاقىتتا پەداگوگيكالىق ىزدەنىسىن عىلىممەن شەبەر ۇشتاستىردى. ەۋروپانىڭ بەدەلدى عىلىمي ورتالىقتارىندا ءدارىس وقۋى وسى وي ەڭبەگىنىڭ جەمىسى بولاتىن.
شيەلى توپىراعىنان تۇلەپ ۇشىپ، رەسپۋبليكالىق فيزيكا-ماتەماتيكا مەكتەبىن، ماسكەۋ مەملەكەتتىك ۋنيۆەرسيتەتىن بىتىرگەن اعامىز ونەگەلى ءومىر جولىندا پاراسات پەن پايىمنىڭ، ەڭبەكقورلىق پەن ۇلتجاندىلىقتىڭ شىنايى ۇلگىسىن كورسەتىپ كەلەدى.
تاۋەلسىزدىكتىڭ العاشقى جىلدارىنان بەرى جاۋاپتى قىزمەتتەردە شىڭدالىپ، عىلىم مەن مەملەكەتتىك باسقارۋ ءىسىن قاتار تىزگىندەگەن كەمەل تۇلعانىڭ ءومىر جولى – بۇگىنگى بۋىن ءۇشىن ۇلكەن مەكتەپ.
ونىڭ اۆتورلىق ەڭبەكتەرى ەلىمىزدىڭ ءبىلىم مەن عىلىم سالاسىنىڭ الەۋەتىن ارتتىرىپ، جاستارعا جول كورسەتەر قۇندى دۇنيەگە اينالدى.
بىلتىر اسقار اعامىزدىڭ تۋعان جەرى قىزىلوردادا فيزيكا-ماتەماتيكا مەكتەپ-ينتەرناتى اشىلىپ، العاشقى شاكىرتتەرىن قابىلدادى. بولاشاقتا وسى ءبىلىم ورداسىنان اكادەميكتىڭ جولىن قۋعان، ناقتى عىلىمنىڭ شامشىراعىن جاققان ماتەماتيكتەر شىعاتىنىنا سەنىمىمىز مول.
ەلىمىزدەگى عىلىم مەن ءبىلىم سالاسىنىڭ الەۋەتىن ارتتىرۋعا سانالى عۇمىرىن ارناعان اسقار سەرقۇلۇلىن بارشا جەرلەستەرىنىڭ اتىنان مەرەيتويىمەن قۇتتىقتايمىز.
مەرەيلى كۇندە اعامىزعا زور دەنساۋلىق، ۇزاق عۇمىر، وتباسىنا باق-بەرەكە تىلەيمىز.
جاڭا باستامالاردى جۇزەگە اسىراتىن، عيبراتتى جولدى جالعايتىن جاس عالىمداردى تاربيەلەۋدەگى ادال ەڭبەگىڭىز تابىستى بولعاي!
نۇرلىبەك نالىباەۆ
