بۇگىن قازاق كسر-ءنىڭ حالىق ءارتىسى، قازاقستان مەملەكەتتىك سىيلىعىنىڭ لاۋرەاتى روزا رىمباەۆانىڭ تۋعان كۇنى. ءانشى 66 جاسقا تولدى، دەپ حابارلايدى «ادىرنا» ۇلتتىق پورتالى.
روزا رىمباەۆا 1957 جىلى 28 قازاندا سەمەي وبلىسى جاڭعىزتوبە اۋدانىندا دۇنيەگە كەلگەن. ت.جۇرگەنوۆ اتىنداعى الماتى تەاتر-كوركەمونەر ينستيتۋتىن بىتىرگەن، مۋزىكالىق كومەديا اكتەرى. ەسترادا ءانشىسى (سوپرانو), پەداگوگ، پروفەسسور.
قازاق كسر حالىق ءارتىسى، قر مەملەكەتتىك سىيلىعىنىڭ لاۋرەاتى، قىرعىزستان مەن وزبەكستاننىڭ ەڭبەك سىڭىرگەن ءارتىسى. 1976 جىلدان – «گۇلدەر» رەسپۋبليكالىق ەسترادالىق-جاستار ءانسامبلىنىڭ مۇشەسى. 1979 جىلدان - قازاق مەملەكەتتىك «قازاقكونتسەرت» بىرلەستىگىنىڭ ءانشىسى. «پاراسات» وردەنىمەن ماراپاتتالعان. «ەسترادا جۇلدىزى» اتالىمىندا «جىل ادامى» (2000) اتانعان. قازاقستان لەنين كومسومولى سىيلىعىنىڭ، «ءومىردى انمەن ورنەكتەپ» تەلەۆيزيالىق كونكۋرسىنىڭ، بۇكىلوداقتىق جاس ورىنداۋشىلار كونكۋرسىنىڭ لاۋرەاتى. «التىن ورفەي»، «سوپوت-77»، «التىن ميكروفون» فەستيۆالدارىنىڭ گران-پري يەگەرى.
ءانشى حالىق اراسىندا كينواكتريسا رەتىندە دە تانىمال. ول «دو سۆيدانيا، مەدەو» فيلمىندە باستى ءرولدى سومدادى، ءارى «پەرۆايا پەسنيا» ءفيلمى، «جەنسكي ۆزگلياد»، «روزا رىمباەۆا»، «روزا»، «حۆوست كومەتى»، «ي سنوۆا زدراۆستۆۋيتە!» دەرەكتى فيلمدەرىنە ءتۇستى.
«ادىرنا» ۇلتتىق پورتالى
