ارقالىق قالاسىنىڭ جاڭعىرتىلعان اۋەجايى 2026 جىلدىڭ ەكىنشى جارتىسىندا پايدالانۋعا بەرىلەدى دەپ جوسپارلانىپ وتىر. بۇل تۋرالى قالا اكىمى ءامىرحان اسانوۆ مالىمدەدى، دەپ حابارلايدى "ادىرنا".
اكىمنىڭ ايتۋىنشا، اۋە ايلاعىنىڭ ىسكە قوسىلۋى ءوڭىر ءۇشىن ستراتەگيالىق ماڭىزعا يە. جوسپارعا سايكەس، العاشقى رەيستەر الماتى، استانا جانە قوستاناي باعىتتارى بويىنشا جۇزەگە اسادى.
"جوسپار بويىنشا العاشقى ۇشاقتار الماتى، استانا جانە قوستاناي باعىتتارى بويىنشا ۇشادى. ياعني، اۋەجاي بيزنەس، ءبىلىم بەرۋ، تۋريزم جانە جولاۋشىلار قاتىناسىنىڭ جاڭا بەلەسكە كوتەرىلۋىنە جول اشادى. ارقالىقتىڭ ترانزيتتىك الەۋەتى ارتىپ، ءوڭىر دامۋىنا وڭ سەرپىن بەرەتىن جاڭا مۇمكىندىكتەر پايدا بولادى", - دەدى قالا باسشىسى.
قالا باسشىسى اۋە قاتىناسىنىڭ قايتا جاندانۋى بيزنەس بايلانىستاردى كۇشەيتىپ، تۋريزم مەن جولاۋشىلار تاسىمالىن ارتتىرۋعا، سونداي-اق ارقالىقتىڭ ترانزيتتىك الەۋەتىن كوتەرۋگە مۇمكىندىك بەرەتىنىن اتاپ ءوتتى.
سونداي-اق «احمەت بايتۇرسىنۇلى اتىنداعى قوستاناي حالىقارالىق اۋەجايى» اق باسقارما توراعاسىنىڭ ورىنباسارى جاسۇلان ىسقاقوۆ اۋەجايدىڭ اشىلۋى الەۋمەتتىك تۇرعىدان دا ماڭىزدى ەكەنىن جەتكىزدى.
"ارقالىق اۋەجايى ىسكە قوسىلعان سوڭ، قالا تۇرعىندارىن تۇراقتى جۇمىسپەن قامتاماسىز ەتۋ، حالىقتىڭ الەۋمەتتىك جاعدايىن ارتتىرۋ تۇرعىسىنان دا مول پايدا اكەلەدى. بۇگىنگى بوس جۇمىس ورىندارى جارمەڭكەسىنىڭ ناتيجەسىندە كوپتەگەن ازاماتتار تۇراقتى جۇمىسقا ورنالاسادى. اركىم وزىنە قولايلى جۇمىس تاۋىپ، الداعى جازدا اشىلاتىن اۋەجايدىڭ حالىققا ساپالى قىزمەت كورسەتۋىنە ۇلەس قوساتىن بولادى", - دەدى ول.
سونىمەن قاتار جەرگىلىكتى «ارقالىق حابارى» باسىلىمىنىڭ جازۋىنشا، ارقالىق اۋە ايلاعىنا الاش قايراتكەرى، ۇلت زيالىسى مىرجاقىپ دۋلاتۇلىنىڭ ەسىمى بەرىلۋى ىقتيمال. جاسۇلان ىسقاقوۆتىڭ مالىمەتىنشە، ول 2026 جىلدىڭ اقپان ايىنان باستاپ جاڭادان قۇرىلعان فيليال — مىرجاقىپ دۋلاتۇلى اتىنداعى ارقالىق قالالىق اۋەجايىنىڭ ديرەكتورى قىزمەتىنە كىرىسەدى.
ايتا كەتەيىك، ارقالىق اۋەجايى XX عاسىردىڭ ەكىنشى جارتىسىندا سالىنعان. 1990-جىلدارداعى ەكونوميكالىق داعدارىس سالدارىنان اۋە رەيستەرى سيرەپ، نىسان ۇزاق ۋاقىت جۇمىس ىستەمەي تۇرعان.
