قازاقستانداعى حالىقارالىق جولاۋشىلار اعىنىنىڭ جارتىسىنان استامىن قامتاماسىز ەتەتىن الماتى حالىقارالىق اۋەجايى جاڭعىرتىلىپ جاتىر. بۇل تۋرالى الماتى قالاسى اكىمىنىڭ ورىنباسارى ولجاس سماعۇلوۆ وڭىرلىك كوممۋنيكاتسيالار قىزمەتىنىڭ الاڭىندا وتكەن ءباسپاسوز كونفەرەنتسياسى بارىسىندا مالىمدەدى.
قالا اكىمى دارحان ساتىبالدىنىڭ تاپسىرماسىنا سايكەس، قالا اكىمدىگىنىڭ قولداۋىمەن جۇزەگە اسىرىلىپ جاتقان جوبا بۇل وڭىردەگى ەڭ ءىرى ينفراقۇرىلىمدىق وزگەرىستەردىڭ ءبىرى بولماق.
«الماتى حالىقارالىق اۋەجايىنا قاتىستى بىزدە ۇلكەن جوسپار بار، ونى ەۋرازيا كەڭىستىگىندەگى باستى اۆياتسيالىق حابقا اينالدىرعىمىز كەلەدى. 2029 جىلعا دەيىن جەكە ينۆەستيتسيالار ەسەبىنەن اۋەجايعا 360 ميلليون اقش دوللارىنان استام قارجى سالىنادى. ىشكى تەرمينالدار جاڭعىرتىلادى، وسى زامانعى قوناقۇي، كوپدەڭگەيلى اۆتوتۇراق سالىنىپ، ۇشۋ-قونۋ جولاعى دا جوندەۋدەن وتەدى»، – دەدى سماعۇلوۆ.
2050 جىلعا دەيىنگى Horizon باعدارلاماسى اياسىندا جۇزەگە اسىپ جاتقان اۋەجايدىڭ دامۋ بارىسى بەس كەزەڭنەن تۇرادى. ءبىرىنشى كەزەڭى 2025 جىلى باستالعان، ول 130 جوبانى قامتيدى.
بۇدان بولەك، رۋلدىك جولاق پەن تەحنيكالىق قىزمەت كورسەتۋ انگارىن سالۋ جوسپارلانىپ وتىر.
جاڭعىرتۋ ناتيجەسىندە اۋەجاي ەۋروپا مەن ازيانى بايلانىستىراتىن اۆياتسيالىق حابقا اينالىپ، جىلىنا 40 ميلليون جولاۋشىنى قابىلداي الاتىن بولادى. جوبانىڭ قۇرىلىس كەزەڭىندە 1800-دەن استام جۇمىس ورنى جانە تۇراقتى قىزمەت ەتۋ كەزەڭىندە 550 تۇراقتى جۇمىس ورنى اشىلماق.
