ۇلىبريتانيادا العاشقى تولىق اۆتونومدى تىكۇشاق العاش رەت سىناقتان ءوتتى، دەپ حابارلايدى “ادىرنا” ۇلتتىق پورتالى.
اپپارات ليزارد تۇبەگىندەگى پرەدانناك اەرودرومىنان ۇشتى.
Proteus دەپ اتالعان تىكۇشاق — Leonardo كومپانياسى كورولدىك اسكەري-تەڭىز كۇشتەرى ءۇشىن ازىرلەگەن. جوبا بولاشاقتا ءىرى اۆتونومدى تىكۇشاقتاردىڭ پيلوت باسقارۋىنداعى اۋە تەحنيكاسىمەن بىرلەسە ارەكەت ەتۋ مۇمكىندىگىن كورسەتۋگە باعىتتالعان.
تاريحي ءساتتى سالا وكىلدەرى، كورولدىك فلوت پەن ۇلىبريتانيانىڭ قورعانىس ۆەدومستۆولارى باقىلاپ وتىردى.
سىناق كەزىندە Proteus قىسقا باعدارلاما ورىنداپ، بارلىق ۇشۋ جۇيەلەرىن ادامنىڭ تىكەلەي ارالاسۋىنسىز تولىق وزدىگىنەن باسقاردى. تىكۇشاقتا ەكيپاجدىڭ ورنىنا زاماناۋي سەنسورلار مەن بورتتىق ەسەپتەۋ جۇيەلەرى ورناتىلعان. Proteus ءبىر توننادان استام جۇك كوتەرە الادى.
