قارجى نارىعىن رەتتەۋ جانە دامىتۋ اگەنتتىگى مەرزىمدى اسكەري قىزمەتكە شاقىرىلعان ازاماتتار تۋرالى مالىمەتتەرمەن الماسۋ قاعيدالارىن بەكىتۋ جونىندەگى قاۋلى جوباسىن قوعامدىق تالقىلاۋعا شىعاردى، دەپ حابارلايدى "ادىرنا".
قۇجاتتا قورعانىس مينيسترلىگى مەن كرەديتتىك بيۋرولار اراسىنداعى اقپارات الماسۋ ءتارتىبى ناقتى كورسەتىلگەن. بۇل مەحانيزم اسكەري قىزمەت كەزەڭىندە قارىزدار بويىنشا تولەمدى كەيىنگە قالدىرۋعا جانە جەكە تۇلعانىڭ كرەديتتىك ەسەبىندە ءتيىستى مارتەبەنى كورسەتۋگە ارنالعان.
قاۋلى جوباسىنا سايكەس، بانكتەر مەن ميكروقارجى ۇيىمدارى شاقىرتۋ العان ازاماتتىڭ كرەديت الۋ جونىندەگى ءوتىنىمىن قاراعاندا، ونىڭ كرەديتتىك ەسەبىندەگى مارتەبەسىن تەكسەرۋى قاجەت. ەگەر جەكە تۇلعا مەرزىمدى اسكەري قىزمەتتە ەكەنىن كورسەتەتىن اقپارات بولسا، كرەديت بەرۋ ءوتىنىمى قابىلدانبايدى.
اگەنتتىك مالىمەتىنشە، بۇل باستاما «قازاقستان رەسپۋبليكاسىنداعى بانكتەر جانە بانك قىزمەتى تۋرالى» زاڭ تالاپتارىن ىسكە اسىرۋعا باعىتتالعان جانە الەۋمەتتىك-ەكونوميكالىق نەمەسە قۇقىقتىق جاعىنان تەرىس سالدار تۋدىرمايدى.
ەسكە سالساق، وتكەن جىلى مەرزىمدى اسكەري قىزمەتتەگى ازاماتتاردىڭ 9 ملرد تەڭگەدەن استام نەسيەسى تولەمدى كەيىنگە شەگەرۋمەن راسىمدەلگەن بولاتىن.
