قازاقستاننىڭ كولىك مينيسترلىگى 2024 جىلعى 25 جەلتوقساندا اقتاۋ ماڭىندا بولعان Azerbaijan Airlines كومپانياسىنىڭ Embraer 190 (بورت 4K-AZ65) ۇشاعىنىڭ اپاتىن تەرگەۋ جونىندەگى ارالىق مالىمەتىن جاريالادى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
قۇجاتقا سايكەس، ۇشاق باكۋ (UBBB) – گروزنىي (URMG) باعىتى بويىنشا جولاۋشىلار رەيسىن ورىنداعان. اپات سالدارىنان 38 ادام، سونىڭ ىشىندە 3 ەكيپاج مۇشەسى قازا تاۋىپ، 29 ادام ءارتۇرلى جاراقات العان ەدى.
مينيسترلىك حابارلاۋىنشا، اپاتتى تەرگەۋ جونىندەگى كوميسسيا قازاقستان كولىك ءمينيسترىنىڭ ۋاقىتشا مىندەتىن اتقارۋشى وكىمىمەن 2024 جىلعى 26 جەلتوقساندا قۇرىلىپ، اپات سەبەپتەرى مەن وعان ىقپال ەتكەن فاكتورلاردى انىقتاۋ بويىنشا جۇمىس جۇرگىزۋدە.
كوميسسيا قۇرامىنا ازەربايجان، رەسەي، برازيليا وكىلدەرى جانە حالىقارالىق ازاماتتىق اۆياتسيا ۇيىمىنىڭ باقىلاۋشىسى كىرگەن.
تەرگەۋ بارىسىندا ەكيپاج جانە ديسپەتچەرلەر تۋرالى مالىمەتتەر، ۇشاققا دايىندىق جانە رەيستى ورىنداۋ قۇجاتتارى، مەتەورولوگيالىق اقپارات جانە تەحنيكالىق قىزمەت كورسەتۋ ماتەريالدارى زەرتتەلگەن. ۇشاقتىڭ بورتىنا ورناتىلعان دەرەكتەر جازعىشتار قالپىنا كەلتىرىلگەن. اپات ورنى ەگجەي-تەگجەيلى تەكسەرىلىپ، ۇشاق كونسترۋكتسيالارىنىڭ ورنالاسۋى فوتو جانە ۆيدەو ارقىلى تىركەلگەن، اگرەگاتتار اپات ورنىنان شىعارىلىپ، سىرتقى مەتالل وبەكتىلەردىڭ ساراپتاماسى جۇرگىزىلىپ، جارىلعىش زاتتاردىڭ ىزدەرى تابىلماعان. ال ءۇش وتتەگى باللونىندا جارىلىس بەلگىلەرى بولماعان.
تەرگەۋ اياسىندا سىرتقى مەتالل وبەكتىلەرگە كەشەندى ساراپتاما جۇرگىزىلدى. ناتيجەسىندە جارىلعىش زاتتاردىڭ ىزدەرى انىقتالعان جوق، ال ءۇش وتتەگى باللونىندا جارىلىس بەلگىلەرى جوق.
«ۇشاققا كەلگەن زاقىمدار، بولجام بويىنشا، اسكەري بولىمشەدەن شىققان ەلەمەنتتەردىڭ اسەرىنەن پايدا بولعان، الايدا ولاردىڭ ناقتى شىعۋ تەگىن انىقتاۋ مۇمكىن بولمادى»، - دەلىنگەن مينيسترلىك حابارلاماسىندا.
قازىر كوميسسيا ەكى جۇمىس توبى ارقىلى قاقتىعىس ايماقتارى مەن اسكەري سەكتورلار ماڭىنداعى ۇشۋ تاۋەكەلدەرىن تالداۋ مەن اقتاۋ ماڭىنداعى گيدراۆليكالىق جۇيەنىڭ №2 بولىگىن قايتا قالپىنا كەلتىرۋ جۇمىستارىن جۇرگىزىپ جاتىر.
مينيسترلىك حابارلاۋىنشا، كوميسسيا وبەكتيۆتى جانە تەك ناقتى فاكتىلەرگە سۇيەنىپ قورىتىندى شىعارادى.
