اقتاۋدا 12 جاستاعى ءجاسوسپىرىم قىز ۇستىنە فۋتبول قاقپاسى قۇلاپ، جاراقات الدى. وقيعاعا قاتىستى اقتاۋ قالالىق تۇرعىن-ءۇي كوممۋنالدىق شارۋاشىلىق ءبولىمى تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، اۋرۋحانادا ءجاسوسپىرىمنىڭ ماڭدايى مەن قاباعىن تىگىپ بەرگەن. جابىرلەنۋشى قىزدىڭ وتباسى قارجىلىق كومەككە مۇقتاج ەكەنى الەۋمەتتىك جەلىدە جازىلدى.
وقيعاعا قاتىستى اقتاۋ قالالىق تۇرعىن-ءۇي كوممۋنالدىق شارۋاشىلىق ءبولىمى تۇسىنىكتەمە بەردى. ايتۋلارىنشا، توزىعى جەتكەن اۋلالار اباتتاندىرىلىپ، ويىن الاڭدارى جوندەلىپ جاتقان.
"قالا اۋماعىنداعى توزىعى جەتكەن سپورت الاڭدارىن جاڭارتۋ ماقساتىندا جاڭادان 50 دانا سپورت الاڭىن ورناتۋ جوسپارلانىپ، مەردىگەر مەكەمە انىقتالعان بولاتىن. ول - "كومپانيا ستروي يندۋستريا" جشس", - دەيدى ۆەدومستۆو.
مەردىگەر اۋلالاردىڭ ءتىزىمىن جاساپ، ىسكە كىرىسىپ تە كەتكەن.
"وقيعا بولعان 2-شاعىن اۋدانداعى №71 تۇرعىن ءۇيدىڭ ماڭىندا ورنالاسقان فۋتبول الاڭىن جاڭارتۋ ماقساتىندا دەمونتاج جۇمىستارى جۇرگىزىلدى. دەمونتاجدالعان جابدىقتار تولىقتاي شىعارىلىپ، تەحنيكاعا تيەلگەن. الايدا ەكى فۋتبول قاقپاسى تەحنيكاعا سىيماي قالعاندىقتان الاڭدا قالدىرىلعان", - دەيدى تكش ءبولىمى.
ءجاسوسپىرىمنىڭ ۇستىنە بوس تۇرعان قاقپا قۇلاعان. قازىرگى كۇنى اقتاۋ قالالىق پوليتسيا باسقارماسىمەن بىرلەسىپ، ءتيىستى شارا قابىلداۋ ماقساتىندا مونيتورينگ جۇمىستارى جۇرگىزىلۋدە، دەيدى قالالىق تكش.
ال مەردىگەر "كومپانيا ستروي يندۋستريا" جشس "Lada.kz" پورتالىنا بالاعا قاجەتتى كومەكتىڭ ءبارى كورسەتىلەتىنىن ايتتى.
ء"بىزدىڭ جۇمىسشىلار جۇمىستارىن كەشكى ساعات 19:00-گە دەيىن ىستەدى. ال وقيعا 18:00-19:00 اراسىندا بولعان. جۇمىسشىلار ىستەگەن جۇمىستارىن سول ۋاقىتتا ۆاتساپقا جىبەرگەن دە بولاتىن. كەلەسى كۇنى ولار قالعان زاتتاردى الىپ كەتۋگە كەلگەن. بىراق قاقپانى الىپ كەتپەدى. ويتكەنى تۇرعىندار ءوز قاراجاتىنا ساتىپ العاندىقتان قالدىرۋىمىزدى سۇراعان", - دەيدى مەردىگەر مەكەمە باسشىسى ەلدار امانعاليەۆ.
ول سونداي-اق زارداپ شەككەن قىزدىڭ تۋىستارىمەن بايلانىسقانىن ايتتى
"قازىر اقتاۋدا جانە استانادا دارىگەر ىزدەيمىز. بارلىعىن تولەۋگە دايىن - ءدارى-دارمەكتەر، وپەراتسيا. قازىر تىرتىقتاردى جازۋعا مۇمكىندىك بەرەتىن وپەراتسيالار بار. قىزعا بارىنشا كومەكتەسەمىز", - دەدى ەلدار امانعاليەۆ.
