اقتاۋداعى اتا-انالار ورىس تىلىندە وقىتاتىن باستاۋىش سىنىپتاردىڭ اشىلماۋىنا بايلانىستى الاڭداۋشىلىق بىلدىرۋدە، دەپ حابارلايدى “ادىرنا” ۇلتتىق پورتالى Lada.kz-كە سىلتەپ.
بالا ءبىلىمى ءۇشىن دابىل قاققان اتا-انالار قالالىق ءبىلىم ءبولىمى №31 مەكتەپتە ورىس تىلىندە وقىتاتىن باستاۋىش سىنىپتار اشىلادى دەپ ۋادە بەرگەنىن ايتادى. الايدا مۇنداي سىنىپتار ءالى اشىلماعان.
جاڭا مەكتەپتىڭ قۇرىلىسى كەزىندە ونىڭ قازاق جانە ورىس تىلدەرىندە وقىتىلاتىنى تۋرالى اقپارات ءبىلىم ءبولىمى مەن وقۋ ورنىنىڭ Instagram پاراقشاسىندا جاريالانعان. اقتاۋداعى 17, 19 جانە 33 ىقشاماۋداندارداعى جاڭا مەكتەپتەرگە وقۋعا ءتۇسۋ ءۇشىن قۇجاتتاردى قابىلداۋ 6 قاڭتاردا باستالعان.
وتكەن اپتادا اتا-انالار ءبىلىم ءبولىمى ورىس تىلىندە وقىتاتىن سىنىپتاردى اشامىز دەپ ۋادە بەرگەنىن ايتتى. ورىس ءبولىمى بولادى دەپ كۇتكەن 200 باستاۋىش سىنىپ وقۋشىسىنىڭ اتا-اناسى مەكتەپكە قۇجات تاپسىرماق بولعاندا، مەكتەپ قۇجاتتاردى قابىلداماعان. مەكتەپتە قابىلداۋعا قاتىستى بارلىق سۇراقتار قالالىق ءبىلىم باسقارماسىندا قارالىپ جاتقانى تۋرالى حابارلاما ىلىنگەن.
“بۇل ءبىزدىڭ بالالارىمىزدىڭ قۇقىقتارىنىڭ بۇزىلۋى. ولاردىڭ قازاقشا وقيتىنداردان قانداي ايىرماشىلىعى بار؟ ولاردىڭ دا وسى شاعىن اۋداندا تۇرۋعا تولىق قۇقىعى بار. ورىس تىلىندە وقىتاتىن 1-7 سىنىپتار اراسىندا ەڭ بولماعاندا ءبىر سىنىپتان ۇيىمداستىرسىن”، - دەيدى اتا-انالار.
قالالىق ءبىلىم باسقارماسى ارنايى كوميسسيا قۇرىپ، ورىس تىلىندە وقىتاتىن سىنىپتاردى اشپاۋ تۋرالى شەشىم شىعارعانى انىقتالدى. بىرىنشىدەن، مۇندا كادر تاپشىلىعى بار. ەكىنشىدەن، مەكتەپتە ورىن جەتكىلىكسىزدىگى سەبەپ بولعان. مەكتەپتىڭ سىيىمدىلىعى 900 ورىندىق قانا، ال بالالاردى مەملەكەتتىك تىلدە وقۋعا قابىلداۋعا 1500 ءوتىنىش تۇسكەن. وسىعان بايلانىستى شەنەۋنىكتەر اتا-انالارعا كومەك كورسەتە المايتىندارىن جەتكىزدى.
اتا-انالار قۇقىقتارىن سوتتا قورعاۋعا دايىن ەكەندەرىن ءبىلدىرىپ، ءبىلىم باسقارماسىنىڭ باسشىلىعىنا جۇگىنۋدى جوسپارلاپ وتىر.
