قوستاناي وبلىسىندا «كىتاپ وقيتىن ۇلت» جوباسىنا 55 مىڭنان استام تۇرعىن بەلسەندى قاتىسىپ جاتىر. وقىرماندار كوشىن مەكتەپ وقۋشىلارى باستاپ تۇر – ولاردىڭ سانى 30 703-كە جەتتى. بۇل جاس ۇرپاقتىڭ كىتاپ وقۋعا دەگەن قىزىعۋشىلىعىنىڭ جوعارى ەكەنىن ايقىن كورسەتەدى.
ەڭ بەلسەندى ايماق – قوستاناي قالاسى: قالا مەكتەپتەرىنەن 6418 وقۋشى تىركەلگەن. ودان كەيىنگى ورىنداردا رۋدنىي قالاسى (4788), اۋليەكول اۋدانى (3112), قوستاناي اۋدانى (2501) جانە جىتىقارا اۋدانى (2195) تۇر. باسقا قالالار مەن اۋدانداردىڭ وقۋشىلارى دا جوباعا بەلسەندى تۇردە قوسىلعان.
«كىتاپ وقيتىن اۋلەت» باعىتى بويىنشا وبلىستا 10 122 وتباسى تىركەلدى.
وتباسىلىق وقۋ ءداستۇرى – ۇرپاقتار ساباقتاستىعىنىڭ جارقىن كورىنىسى.
«كىتاپ وقيتىن پەداگوگ» باعىتىندا 11 047 مۇعالىم قاتىسۋدا. جوباعا ءبىلىم بەرۋ ۇيىمدارىنىڭ باسشىلارى دا بەلسەندى اتسالىسىپ جاتىر: 434 ديرەكتور جانە 277 ديرەكتور ورىنباسارى كىتاپ وقۋعا نيەت ءبىلدىردى.
«كىتاپ وقيتىن كوللەدج» باعىتىندا وبلىستىڭ 33 كوللەدجىنەن 2028 ستۋدەنت تىركەلگەن.
«كىتاپ وقيتىن مەملەكەتتىك قىزمەتشى» باعىتىندا 300-دەن استام ادام قاتىسىپ جاتىر. اۋدان جانە قالا اكىمدەرى اپپاراتتارىنىڭ، باسقارما قىزمەتكەرلەرىنىڭ قاتىسۋى جوعارى. ەرەكشە كوزگە تۇسكەنى – فەدوروۆ اۋدانى: 12 اۋىلدىق وكرۋگ اكىمى جانە 18 ءبولىم باسشىسى تىركەلگەن. رۋدنىي قالاسىنان – 15, قارابالىق اۋدانىنان – 9 اۋىل اكىمى، امانگەلدى اۋدانىنان – 5, قاراسۋ اۋدانىنان – 3 اۋىل اكىمى جوباعا قوسىلدى. باسقارما باسشىلارىنىڭ ورىنباسارلارى مەن قالا اكىمىنىڭ ورىنباسارلارى دا قاتىسۋدا.
«كىتاپ وقيتىن ۋنيۆەرسيتەت» باعىتىندا وبلىستىڭ 6 جوعارى وقۋ ورنىنان 1008 ستۋدەنت تىركەلگەن.
قاتىسۋشىلاردىڭ پىكىرى:
قوستاناي قالاسى №31 مەكتەپتىڭ باستاۋىش سىنىپ مۇعالىمى قىمبات سۇلتانوۆا: «بۇل جوباعا قاتىسۋ مەن ءۇشىن كاسىبي مىندەت قانا ەمەس، شىنايى قۇشتارلىق. وقيتىن مۇعالىم – ءبىلىمدى مۇعالىم. جاڭا ادىستەمەلەر مەن پسيحولوگيالىق-پەداگوگيكالىق ەڭبەكتەردى وقي وتىرىپ، ساباق بەرۋ ساپاسىن ارتتىرامىز. مۇعالىمنىڭ قولىنداعى كىتاپ – وقۋشىلار ءۇشىن ەڭ ۇزدىك ۇلگى ءارى كۇشتى موتيۆاتسيا. قازىر ورىنشا قارابالينانىڭ “ۇستاز باقىتى” كىتابىن وقىپ جاتىرمىن. بۇل شىعارما ۇستازدىقتىڭ رۋحاني جانە پراكتيكالىق قىر-سىرىن قايتا اشقانداي اسەر قالدىرادى».
مەڭدىقارا اۋدانى جانگەلدى اۋىلىنىڭ تۇرعىنى، «كىتاپ وقيتىن اۋلەت» باعىتىنىڭ قاتىسۋشىسى ەرلان ءجۇرسىنۇلى ايساعاليەۆ: «جاسىم 56-دا. بالا كەزىمىزدەن كىتاپقا جاستىق بولىپ وستىك. “اباي جولى”، “التىن وردا”، “كوشپەندىلەر”، “قىزىل جەبە”، “ۆولوكولام تاس جولى” سياقتى تۋىندىلارعا جاس كۇنىمنەن قانىقپىن. بۇگىندە دە وقۋدان قول ۇزبەيمىن. جوباعا وتباسىممەن بىرگە قۋانا تىركەلدىك. ەڭ ۇلكەن جەڭىس – ۇرپاق ساناسىنا سىڭەتىن رۋحاني ءنار. كىتاپ وقىعان ۇلت ءاردايىم وزادى».
قوستاناي وبلىسى اكىمدىگى قوعامدىق دامۋ باسقارماسىنىڭ باس مامانى ارايلىم يسماعۇلوۆا («كىتاپ وقيتىن مەملەكەتتىك قىزمەتشى» باعىتى): «جوبا تۋرالى ەستىگەن بويدا قاتىسۋعا شەشىم قابىلدادىم. بالالىق شاعىم كىتاپ وقۋمەن ءوتتى. تىزىمدە ابايدىڭ قارا سوزدەرى، قازاق كلاسسيكاسى، مەملەكەت باسقارۋ، الەمدىك ساياسات، پسيحولوگيا تاقىرىبىنداعى ەڭبەكتەر بار. وسى ۋاقىتقا دەيىن 4 كىتاپتى اياقتادىم، قازىر نيككولو ماكياۆەلليدىڭ ء“امىرشى” تراكتاتىن وقىپ جاتىرمىن. كەيبىر كىتاپتاردى ارنايى ساتىپ الدىم – ولار جوبا اياقتالعاننان كەيىن دە قۇندىلىعىن جوعالتپايدى».
جوبانى «Amanat» پارتياسىنىڭ قولداۋىمەن «كىتاپ وقيتىن ۇلت – چيتايۋششايا ناتسيا» قوعامدىق قورى جانە قوستاناي وبلىسى اكىمدىگى جۇزەگە اسىرۋدا. وڭىرلىك دەمەۋشى – «ولجا اگرو» جشس اگروحولدينگى.
2025 جىلدىڭ قىركۇيەگىندە «كىتاپ وقيتىن ۇلت» جوباسى پيلوتتىق تۇردە قوستاناي، قاراعاندى وبلىستارى مەن شىمكەنت قالاسىندا باستاۋ العان بولاتىن. قازىرگى تاڭدا ءۇش وڭىردە جوباعا 189 مىڭنان استام ادام قاتىسۋدا، جوبا قورىتىندىسى 2026 جىلعى ساۋىردە شىعارىلادى.
