قوستاناي وبلىسى جىتىقارا قالاسىندا جەكە تۇرعىن ۇيدە شىققان ءورت سالدارىنان ءۇي شاتىرى وپىرىلىپ ءتۇسىپ، بەس بالا قازا تاپتى، دەپ حابارلايدى «ادىرنا» ۇلتتىق پورتالى.
وبلىستىق اكىمدىكتىڭ حابارلاۋىنشا، ءورت تاڭعى ساعات 4:29-دا باستالعان. ءورت سوندىرۋشىلەر وقيعا ورنىنا 7 مينۋت ىشىندە جەتكەنىمەن، ءۇي تولىعىمەن ورتكە ورانعان. ساعات 6:08-دە ءورت ءسوندىرىلدى.
«وكىنىشتىسى، ءۇيىندىنى تازارتۋ ناتيجەسىندە 2011, 2016, 2018, 2019, 2022, 2023 جىلى تۋعان كامەلەتكە تولماعان بالالار ۇيدەن تابىلدى. 2011 جىلى تۋعان ۇلكەن بالاسى عانا امان قالعان. الدىن الا مالىمەت بويىنشا، بالالاردىڭ اناسى كەشكىسىن قۇربىسىنا كەتكەن. كۇيەۋى تۇرمەدە وتىر»، - دەلىنگەن وبلىستىق اكىمدىكتىڭ مالىمدەمەسىندە.
الدىن الا مالىمەت بويىنشا، پەش قاراۋسىز قالىپ، جالىن سودان پايدا بولۋى مۇمكىن. وقيعانىڭ سەبەپتەرىن ماماندار انىقتاۋدا. ءورت – تەحنيكالىق زەرتتەۋگە تاپسىرىلدى.
ەسكە سالا كەتەيىك، وسىعان ۇقساس جاعداي بەس جىل بۇرىن استانا قالاسى ماڭىنداعى كوكتال شاعىن اۋدانىندا دا بولعان ەدى. ول كەزدە اتا-انالارى تۇنگى اۋىسىمدا جۇمىستا ءجۇرىپ، ۇيىندە جالعىز قالعان بەس بالا ءورت سالدارىنان قازا تاپقان. كورشىلەرى ءورتتى كورىپ كومەككە ۇمتىلعانىمەن، جالىننىڭ كۇشتى بولعانى سونشا، بالالاردى قۇتقارىپ ۇلگەرمەگەن. بەس قىزدىڭ ۇلكەنى نەبارى 13 جاستا، ال ەڭ كىشىسى ءۇش ايلىق ءسابي بولاتىن. وسى وقيعادان كەيىن، تۇرمىستىق جاعداي مەن پەشتىڭ قاۋىپسىزدىگى ماسەلەلەرى تالقىعا ءتۇسىپ، قوعامدى بەي-جاي قالدىرمادى. بۇل جاعدايلار بالالار قاۋىپسىزدىگىن قامتاماسىز ەتۋ مەن تۇرمىستىق جاعدايدىڭ جاقسارۋىنا ۇلكەن ءمان بەرۋ قاجەتتىگىن تاعى ءبىر رەت كورسەتىپ وتىر
