مادەنيەت جانە اقپارات ءمينيسترى ارمان قىرىقباەۆ «PARAQTA» ونلاين كىتاپحانا پلاتفورماسىنىڭ نەگىزىن قالاۋشىلار كەرىم ايانقىزى مەن ەرداۋلەت قۇرالدى قابىلدادى، دەپ حابارلايدى «ادىرنا» ءتىلشىسى.
كەزدەسۋدە وتاندىق كىتاپ وقۋ مادەنيەتىن دامىتۋ، تسيفرلىق پلاتفورمانى جەتىلدىرۋ جانە جاستاردىڭ كىتاپقا قىزىعۋشىلىعىن ارتتىرۋ ماسەلەلەرى تالقىلاندى.
پلاتفورما نەگىزىن قالاۋشىلاردىڭ ايتۋىنشا، مينيستر ولاردىڭ «PARAQTA» جوباسى تۋرالى جاريالانىمدارىمەن تانىسىپ، ارنايى كەزدەسۋگە شاقىرعان.
جيىندا مينيستر مەملەكەت باسشىسى قاسىم-جومارت توقاەۆتىڭ كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى باستامالارى اياسىندا جۇزەگە اسىرىلىپ جاتقان جۇمىستار تۋرالى بايانداعان.
اتاپ ايتقاندا، مينيسترلىكتىڭ ۇيلەستىرۋىمەن ءوتىپ جاتقان «كىتاپ وقيتىن ۇلت» جالپىۇلتتىق مارافونىنىڭ ناتيجەلەرى تانىستىرىلعان. بۇگىندە reading-nation.kz پلاتفورماسىنا 1,4 ميلليوننان استام ادام تىركەلگەن. قاتىسۋشىلار 842 مىڭنان استام كىتاپ وقىپ، وقىعان شىعارمالارى تۋرالى 50 مىڭنان استام بەينەپىكىر جاريالاعان. كەزدەسۋ بارىسىندا ارمان قىرىقباەۆ «PARAQTA» قوسىمشاسىنىڭ جۇمىسىمەن تانىسىپ، وقىرمانداردىڭ بەلسەندىلىگىنە قىزىعۋشىلىق بىلدىرگەن. سونداي-اق جاستاردى كىتاپ وقۋعا كەڭىنەن تارتۋ ءۇشىن قانداي قولداۋ قاجەت ەكەنىن سۇراعان.
«PARAQTA» – وقىرماندارعا كىتاپتى باستاپ قانا قويماي، سوڭىنا دەيىن وقىپ شىعۋعا مۇمكىندىك بەرەتىن قازاقستاندىق پلاتفورما. قازىرگى ۋاقىتتا جوباعا 15 186 وقىرمان تىركەلىپ، 1,2 ميلليون بەت وقىلعان. ال 10 738 كىتاپ تولىق اياقتالعان. سونىمەن قاتار پلاتفورما اياسىندا 180 كىتاپ كلۋبى جۇمىس ىستەيدى.
جوبا ءبىر جىل ەكى ايدان بەرى جۇمىس ىستەپ كەلەدى. التى اي بۇرىن ونىڭ سايتى ىسكە قوسىلسا، ەكى اپتا بۇرىن ءموبيلدى قوسىمشاسى App Store دۇكەنىندە قولجەتىمدى بولعان.
پلاتفورما نەگىزىن قالاۋشىلاردىڭ ايتۋىنشا، قازىرگى باستى قاجەتتىلىكتەردىڭ ءبىرى – ەلەكتروندى كىتاپ قورىن تولىقتىرۋ. بۇگىندە قوسىمشادا اۆتورلىق قۇقىق مەرزىمى اياقتالىپ، قوعامدىق يگىلىككە وتكەن 150-گە جۋىق كىتاپ تەگىن ۇسىنىلعان. الايدا وقىرماندار پلاتفورمانىڭ وزىندە وقۋعا بولاتىن شىعارمالار سانىن كوبەيتۋدى سۇرايدى.
وسىعان بايلانىستى مينيسترلىك كىتاپ قورىن زاڭدى نەگىزدە تولىقتىرۋعا قولداۋ كورسەتۋگە ۋادە بەرگەن. سونىمەن قاتار وفلاين كەزدەسۋلەر مەن بىرلەسكەن ءىس-شارالار وتكىزۋگە ارنالعان الاڭ قاراستىرۋ ماسەلەسى دە تالقىلانعان.
جوبا اۆتورلارى مينيستر ارمان قىرىقباەۆقا جانە مينيسترلىكتىڭ ارحيۆ، قۇجاتتاما جانە كىتاپ ءىسى كوميتەتىنىڭ توراعاسى ايزادا قۇرمانوۆاعا باستاماعا قىزىعۋشىلىق تانىتىپ، قولداۋ كورسەتكەنى ءۇشىن العىس ءبىلدىردى.
