16 مامىردا مەملەكەت باسشىسى «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدى. قۇجات ادامي كاپيتالدى دامىتۋعا، قوعامنىڭ زياتكەرلىك الەۋەتىن نىعايتۋعا جانە ازاماتتاردىڭ كىتاپ وقۋعا دەگەن قىزىعۋشىلىعىن ارتتىرۋعا باعىتتالعان.
پرەزيدەنت تاپسىرمالارىن ورىنداۋ اياسىندا مادەنيەت جانە اقپارات مينيسترلىگى كىتاپحانا سالاسىن جاڭعىرتۋ، كىتاپ وقۋدى كەڭىنەن ناسيحاتتاۋ جانە حالىقتىڭ ءبىلىم مەن اقپاراتقا قولجەتىمدىلىگىن ارتتىرۋ باعىتىندا كەشەندى شارالاردى جۇزەگە اسىرىپ كەلەدى. بۇل رەتتە سالانى تسيفرلاندىرۋعا ەرەكشە ءمان بەرىلۋدە.
بۇگىندە ۇلتتىق جازبا مۇرامىزعا كەڭىنەن قول جەتكىزۋدىڭ نەگىزگى قۇرالدارىنىڭ ءبىرى – ۇلتتىق ەلەكتروندى كىتاپحانا، ياعني قازۇەك. پورتالدا كىتاپتار، سيرەك قۇجاتتار مەن قولجازبالار، مەرزىمدى باسىلىمدار، ديسسەرتاتسيالار، ارحيۆ ماتەريالدارى، اۋديو جانە بەينەجازبالار، كارتالار جانە باسقا دا تسيفرلىق رەسۋرستار جيناقتالعان.
2026 جىلدىڭ باسىنان بەرى قازۇەك ماتەريالدارىن قاراۋ سانى 3,6 ميلليوننان استى. قاشىقتان پايدالانۋشىلار سانى 295 116 ادامعا جەتسە، ەلەكتروندى كوشىرمەلەردى جۇكتەۋ كورسەتكىشى 891 551-ءدى قۇرادى.
وسى كەزەڭدە ەلەكتروندى كىتاپحانا قورىنا 2 506 تسيفرلىق كوشىرمە ەنگىزىلىپ، 437 قۇجات وڭدەۋدەن وتكىزىلدى جانە 127 555 بەت سكانەرلەندى. قازىرگى تاڭدا قازۇەك-ءتىڭ جالپى قورىندا 86 315 قۇجات بار. ونىڭ ىشىندە تسيفرلاندىرىلعان 10 مىڭنان استام قولجازبا مەن سيرەك كىتاپ ساقتالعان.
ەلەكتروندى كىتاپحانا قىزمەتىن الەمنىڭ 122-دەن استام ەلىنىڭ وقىرماندارى پايدالانادى. پورتالعا قازاقستان، قىتاي، رەسەي، اقش، ۆەتنام، وزبەكستان، تۇركيا، گەرمانيا، فرانتسيا جانە قىرعىزستان تۇرعىندارى ەرەكشە قىزىعۋشىلىق تانىتىپ وتىر. ەلەكتروندى قۇجاتتار الەمنىڭ 70 تىلىندە ۇسىنىلعان.
پورتالداعى بارلىق ماتەريالدى تىركەلۋسىز-اق ەركىن قاراۋعا بولادى. قازۇەك قورىندا «مەملەكەتتىك باعدارلامالار اياسىندا جارىق كورگەن كىتاپتار»، «سيرەك قۇجاتتار مەن قولجازبالار»، «تۇركىتىلدەس ەلدەر كىتاپحاناسى» جانە باسقا دا تاقىرىپتىق جيناقتار بار.
الداعى ۋاقىتتا بۇل جۇمىس ۇلتتىق تسيفرلىق كىتاپحانا پلاتفورماسىن قۇرۋ ارقىلى جاڭا دەڭگەيگە كوتەرىلمەك. بىرىڭعاي پلاتفورما ەلەكتروندى كاتالوگتاردى، تسيفرلىق قورلاردى، ءبىلىم بەرۋ رەسۋرستارى مەن زاماناۋي سەرۆيستەردى ءوزارا بىرىكتىرەدى. سونىڭ ناتيجەسىندە ازاماتتار تۇرعىلىقتى جەرىنە قاراماستان وتاندىق ادەبيەتكە، عىلىمي باسىلىمدارعا، سيرەك كىتاپتار مەن ارحيۆ ماتەريالدارىنا ەركىن قول جەتكىزە الادى.
