قاراعاندى وبلىسىندا قوسىمشا ءبىلىم بەرۋ سالاسىنا ەرەكشە ءمان بەرىلۋدە. نەگىزگى باسىمدىق – STEM-جوبالاردى ەنگىزۋ، شاحمات پەن فۋتبولدى دامىتۋ، ەكولوگيالىق تاربيەنى كۇشەيتۋ جانە وقۋشىلاردىڭ كاسىبي باعدارىن جەتىلدىرۋ باعىتتارىنا بەرىلگەن.
وبلىستىق ءبىلىم باسقارماسىنىڭ باسشىسى دۋلات جەكەباەۆ وڭىرلىك كوممۋنيكاتسيالار قىزمەتىنىڭ بريفينگىندە اتاپ وتكەندەي، «STEM-ءبىلىم بەرۋدى ەنگىزۋ» جوباسى وتكەن جىلى ىسكە قوسىلىپ، 2025 جىلدىڭ جەلتوقسانىنا دەيىن جالعاسادى. وسى ۋاقىت ىشىندە وڭىردە 26 جاڭا STEM ۇيىرمەسىن اشۋ، 43 ۇيىرمەنى جاڭارتۋ، وقۋ كابينەتتەرىن زاماناۋي جابدىقتارمەن قامتاماسىز ەتۋ، پەداگوگتەردى دايارلاۋ جانە 7 مىڭنان استام وقۋشىنى قامتۋ جوسپارلانىپ وتىر.
سونداي-اق، «بىلىمدەگى شاحمات» جوباسى دا ءساتتى جۇزەگە اسىرىلۋدا. 2022 جىلى نەبارى بەس مەكتەپتە باستاۋ العان جوبا بۇگىندە 69 ءبىلىم بەرۋ ۇيىمىندا ەنگىزىلگەن.
قاراعاندى قالاسىنداعى №12, №33 مەكتەپتەرى مەن اباي اتىنداعى گيمنازيادا «جاسىل مەكتەپ» جوباسى ىسكە اسۋدا. ونىڭ ماقساتى – وقۋشىلاردىڭ ەكولوگيالىق مادەنيەتىن قالىپتاستىرۋ جانە تابيعاتقا ۇقىپتى كوزقاراس دارىتۋ. بولاشاقتا مۇنداي ەكو سىنىپتاردى قالاداعى باسقا دا مەكتەپتەردە اشۋ جوسپارلانىپ وتىر.
وڭىردە جوعارى سىنىپ وقۋشىلارىنىڭ كاسىبي باعدار بەرۋ جۇيەسى دە بەلسەندى دامۋدا. بۇگىندە وبلىستا سۇرانىسقا يە باعىتتار بويىنشا – مەديتسينا، پەداگوگيكا، ەكولوگيا، اگروونەركاسىپ، IT جانە قۇقىق سالالارىندا – 200-دەن استام بەيىندى سىنىپ جۇمىس ىستەيدى. ال وسى جىلدىڭ قىركۇيەگىنەن باستاپ تاعى 126 جاڭا بەيىندىك سىنىپ اشىلدى. ولاردىڭ ىشىندە قۇرىلىس، تىگىن جانە دانەكەرلەۋ ءىسى، مەتاللۋرگيا، مەديا جانە باسقا دا باعىتتار بار.
وقۋشىلاردىڭ بولاشاق ماماندىعىن تاڭداۋعا كومەك كورسەتۋ ماقساتىندا «ProfiWay» اتتى جاڭا ەلەكتروندىق پلاتفورما ىسكە قوسىلماق. ول ارقىلى وقۋشىلار مەن اتا-انالار وڭىردەگى سۇرانىسقا يە ماماندىقتار مەن وقۋ ورىندارى تۋرالى وزەكتى اقپاراتقا قول جەتكىزە الادى.
