Qaraǧandy oblysynda qosymşa bılım beru salasyna erekşe män berılude. Negızgı basymdyq – STEM-jobalardy engızu, şahmat pen futboldy damytu, ekologiialyq tärbienı küşeitu jäne oquşylardyŋ käsıbi baǧdaryn jetıldıru baǧyttaryna berılgen.
Oblystyq bılım basqarmasynyŋ basşysy Dulat Jekebaev Öŋırlık kommunikasiialar qyzmetınıŋ brifingınde atap ötkendei, «STEM-bılım berudı engızu» jobasy ötken jyly ıske qosylyp, 2025 jyldyŋ jeltoqsanyna deiın jalǧasady. Osy uaqyt ışınde öŋırde 26 jaŋa STEM üiırmesın aşu, 43 üiırmenı jaŋartu, oqu kabinetterın zamanaui jabdyqtarmen qamtamasyz etu, pedagogterdı daiarlau jäne 7 myŋnan astam oquşyny qamtu josparlanyp otyr.
Sondai-aq, «Bılımdegı şahmat» jobasy da sättı jüzege asyryluda. 2022 jyly nebärı bes mektepte bastau alǧan joba bügınde 69 bılım beru ūiymynda engızılgen.
Qaraǧandy qalasyndaǧy №12, №33 mektepterı men Abai atyndaǧy gimnaziiada «Jasyl mektep» jobasy ıske asuda. Onyŋ maqsaty – oquşylardyŋ ekologiialyq mädenietın qalyptastyru jäne tabiǧatqa ūqypty közqaras darytu. Bolaşaqta mūndai eko synyptardy qaladaǧy basqa da mektepterde aşu josparlanyp otyr.
Öŋırde joǧary synyp oquşylarynyŋ käsıbi baǧdar beru jüiesı de belsendı damuda. Bügınde oblysta sūranysqa ie baǧyttar boiynşa – medisina, pedagogika, ekologiia, agroönerkäsıp, IT jäne qūqyq salalarynda – 200-den astam beiındı synyp jūmys ısteidı. Al osy jyldyŋ qyrküiegınen bastap taǧy 126 jaŋa beiındık synyp aşyldy. Olardyŋ ışınde qūrylys, tıgın jäne dänekerleu ısı, metallurgiia, media jäne basqa da baǧyttar bar.
Oquşylardyŋ bolaşaq mamandyǧyn taŋdauǧa kömek körsetu maqsatynda «ProfiWay» atty jaŋa elektrondyq platforma ıske qosylmaq. Ol arqyly oquşylar men ata-analar öŋırdegı sūranysqa ie mamandyqtar men oqu oryndary turaly özektı aqparatqa qol jetkıze alady.
