فەستيۆال 19 جانە 20 ماۋسىمدا ءداستۇرلى جەردە – اقشاعىل كەنتىندە، رەمبازا اۋماعىندا وتەدى. وتكەن جىلى وعان 50 مىڭنان استام ادام كەلگەن.
بيىلعى ماۋسىمدا ۇيىمداستىرۋشىلار رەكوردتان اسادى دەپ كۇتۋدە.
– ءبىز ءتورتىنشى جىل قاتارىنان Balkhash Tour Fest وتكىزۋدەمىز. بۇل جاعاجاي ءتۋريزمىن دامىتاتىن جانە بالقاش ءوڭىرىنىڭ تارتىمدىلىعىن ارتتىراتىن زاكىرلى جوبا. جىل سايىن قاتىسۋشىلار سانى ارتىپ كەلەدى. وتكەن جىلى فەستيۆال 50 مىڭنان استام ادامدى جينادى، بيىل ودان دا كوپ قوناق كەلەدى دەپ كۇتىلۋدە. بۇدان باسقا، Balkhash Tour Fest رەسپۋبليكالىق وقيعالار كۇنتىزبەسىنە ەندى، – دەپ اتاپ ءوتتى قاراعاندى وبلىسى تۋريزم باسقارماسىنىڭ باسشىسى يرينا ليۋبارسكايا.
بيىلعى جىلدىڭ باستى جاڭالىعى – فەستيۆال الاڭى جاز بويى جۇمىس ىستەيدى. دەمالىس كۇندەرى مۇندا جانە بالقاش قالاسىنىڭ مادەني الاڭدارىندا كونتسەرتتەر، سپورتتىق جارىستار جانە دەمالۋشىلارعا ارنالعان ويىن-ساۋىق ءىس-شارالارى وتەدى.
ۇيىمداستىرۋشىلار مازمۇندى باعدارلاما دايىندايدى. تانىمال قازاقستاندىق ارتىستەر Miras Zhugunussov, AYAU, Bellucci, Domino, Nurlan & Murat جانە Qazaq Band ونەر كورسەتەدى. فەستيۆال اۋماعىندا شىعارماشىلىق جانە سپورتتىق ايماقتار، فۋدكورتتار، قولونەرشىلەر جارمەڭكەسى، اشىق اسپان استىنداعى كينوتەاتر جانە وتباسىلىق دەمالىس الاڭدارى اشىلادى.
– كىرەبەرىستە قوناقتاردى ينتەراكتيۆتى LED-اركا قارسى الادى. باعدارلامادا سونداي-اق كوبىك سۋ شاشۋ كەشتەرى، جاركوكروسس، سۋ تاكسي، PikeMan جارىستارى، جاساندى ينتەللەكت جانە كرافت ويىندارى بار. ەكولوگياعا جانە قالدىقتاردى وڭدەۋگە ەرەكشە نازار اۋدارامىز. ستريتباسكەتبولدان، پاننا-فۋتبولدان جانە بي باتلىنان تۋرنيرلەر جالعاسادى. ولاردىڭ ءبىرىنىڭ جەڭىمپازى كوشە بيلەرىنىڭ حالىقارالىق فەستيۆالىندە قازاقستاندى تانىستىرۋ مۇمكىندىگىنە يە بولادى، – دەدى Balkhash Tour Fest ۇيىمداستىرۋشىسى رەنات المانوۆ.
بالالار ءۇشىن انيماتورلار مەن تانىمال «ماشا جانە ايۋ» ءمۋلتفيلمىنىڭ كەيىپكەرلەرىمەن جەكە باعدارلاما ازىرلەندى. سپورت اۋەسقويلارىن جاعاجاي ۆولەيبولى، ارمرەستلينگ، ۇلتتىق گيدروسپورت تۇرلەرى، رەگاتا جانە جەلكەندى سپورت بويىنشا شەبەرلىك سىنىپتارى كۇتىپ تۇر.
فەستيۆالدىڭ اۋماعى دا وزگەرۋدە. مۇندا ەكولوگيالىق اكتسيا اياسىندا كوكتەمدە وتىرعىزىلعان جاڭا اللەياعا ارنالعان تامشىلاتىپ سۋارۋ جۇيەسىن مونتاجداۋ اياقتالدى. ەندى اعاشتاردى سۋارۋ جۇيەلى تۇردە جۇزەگە اسىرىلادى، بۇل جاسىل ايماقتى ساقتاپ قالۋعا جانە الاڭدى تۇرعىندار مەن تۋريستەردىڭ دەمالۋىنا ودان ءارى جايلى ەتۋگە مۇمكىندىك بەرەدى.
