فوتو: وقۋ-اعارتۋ مينيسترلىگى
تۇركىستان وبلىسىنداعى اۋىل مەكتەبىنىڭ تۇلەگى نۇرالى مەدينا الەمنىڭ جەتەكشى جوعارى وقۋ ورىندارىنان 80 شاقىرتۋ الدى. اقش، ەۋروپا جانە بىرىككەن اراب امىرلىكتەرىنىڭ بەدەلدى ۋنيۆەرسيتەتتەرى تالاپكەرگە وقۋ مەن گرانت مۇمكىندىكتەرىن ۇسىنعان. بۇل تۋرالى وقۋ-اعارتۋ مينيسترلىگى مالىمدەدى، دەپ حابارلايدى "ادىرنا".
مالىمەت بويىنشا، حالىقارالىق جوعارى وقۋ ورىندارى نۇرالى مەدينانىڭ اكادەميالىق جەتىستىكتەرىن، كوشباسشىلىق قاسيەتتەرىن جانە قوعامدىق بەلسەندىلىگىن جوعارى باعالاعان.
سونىڭ ناتيجەسىندە تالاپكەر الەمنىڭ ءتۇرلى ەلدەرىندەگى ونداعان بەدەلدى ۋنيۆەرسيتەتتەن شاقىرتۋ العان.
مينيسترلىك مالىمەتىنشە، مەكتەپ تۇلەگى حالىقارالىق IELTS جانە SAT ەمتيحاندارىن ءساتتى تاپسىرىپ، الەمدىك دەڭگەيدەگى ۋنيۆەرسيتەتتەرگە تۇسۋگە جەتكىلىكتى ءبىلىم دەڭگەيىن كورسەتكەن.
نۇرالى مەدينا مەكتەپ قابىرعاسىندا ۇزدىك وقۋشىلاردىڭ قاتارىندا بولعان.
ول عىلىمي، زياتكەرلىك جانە قوعامدىق جوبالارعا بەلسەندى قاتىسىپ، بىرقاتار رەسپۋبليكالىق بايقاۋلاردا جەڭىسكە جەتكەن.
اتاپ ايتقاندا، اعىلشىن ءتىلى پانىنەن وتكەن «جاساندى ينتەللەكت – عىلىمي زەرتتەۋلەردىڭ جاڭا مۇمكىندىگى» تاقىرىبىنداعى رەسپۋبليكالىق عىلىمي-شىعارماشىلىق كونفەرەنتسيادا ءى ورىن يەلەنگەن.
سونداي-اق رەسپۋبليكالىق «وي زەرەك» وليمپياداسىنىڭ جەڭىمپازى اتانعان.
بۇعان دەيىن دە قازاقستاندىق تۇلەكتەر شەتەلدىك ۋنيۆەرسيتەتتەردەن گرانت ۇتىپ الىپ جۇرگەنىمەن، ءبىر تالاپكەردىڭ بىردەن 80 ۋنيۆەرسيتەتتەن شاقىرتۋ الۋى سيرەك كەزدەسەتىن ناتيجە سانالادى.
