ەلدىڭ جارقىن بولاشاعى ماقساتى ايقىن، ساناسى سەرگەك، ءبىلىمدى بارىنەن جوعارى قوياتىن جاستاردىڭ قولىندا. قازىرگى كۇنى تالاپتىڭ تۇلپارىنا ءمىنىپ، ءبىلىم بيىگىنە ۇمتىلعان جاستارعا قولداۋ جىل سايىن ارتۋدا. وبلىس ورتالىقتارىندا جاستار ساياساتى ماسەلەلەرى جونىندەگى باسقارمالار قۇرىلدى. وسى رەتتە قاراعاندى وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ باسشىسى - ءبىرجان نۇرجانۇلىمەن سۇحبات قۇرىپ، جاستارمەن جۇيەلى جۇمىستى جولعا قويعان مەكەمەنىڭ بۇگىنگى تىنىس-تىرشىلىگى، بولاشاق جوسپارلارى توڭىرەگىندە اڭگىمە وربىتتىك.
- ءبىرجان نۇرجانۇلى، ءسىزدىڭ قاراعاندى وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ باسشىسى بولىپ تاعايىندالعانىڭىزعا سەگىز ايدان استى. جالپى كۇتپەگەن كارانتين وبلىستىق جاستار باسقارماسىنىڭ جۇمىسىن قالاي وزگەرتتى؟ سۇحباتىمىزدى وسىدان باستاساق...
- شىندىعىندا دا الەمدى جايلاعان ىندەت ءومىردىڭ بارلىق سالاسىنا وزگەرىس اكەلدى. الايدا، وزگەرىسكە تەز بەيىمدەلۋ قازىرگى ۋاقىتتىڭ باستى تالابى دەر ەدىم. سول سەبەپتى، ءىس-شارالاردى جوسپارلاعاندا قازىرگى جاعدايعا ورايلاستىرىپ، ەكشەپ، دايارلاپ جۇزەگە اسىرۋدامىز. ءبىراز ءىس-شارالار ونلاين فورماتقا اۋىستىرىلدى، ءبىرشاما ءىس-شارالار كارانتين تالاپتارىن ساقتاۋ ارقىلى جۇزەگە اسىرىلۋدا.
- باسقارما قازىر قاي باعىتقا باسىمدىق بەرىپ وتىر؟
- كەز-كەلگەن سالاداعى تيىمدىلىك پەن بىرىزدىلىكتى، ۇزاق مەرزىمدى دامۋ مەن تۇراقتىلىقتى قامتاماسىز ەتۋ ءۇشىن اعىمداعى سۇراقتارمەن قاتار ورنىقتى جۇيە، ينستيتۋتتار قۇرۋمەن تىڭعىلىقتى اينالىسۋ قاجەت. بالكىم، بۇنداي ۇستانىم ۇزاعىراق مەرزىمدى قاجەت ەتىپ، "تەز جەڭىستەرگە" اكەلمەس، بىراق، بەرەرى مول، پايداسى جوعارىراق. سوندىقتان دا، قىزمەتكە كەلگەلى وسى باعىتتا قادام باسۋدامىز.
ءىس-شارالاردى وتكىزۋدىڭ ۇيرەنشىكتى فورماتىنان باس تارتىپ، جاستارعا جۇيەلى تۇردە پايدا بەرەتىن باعىتتارعا باسىمدىق بەرۋدەمىز. مىسالى، وبلىستا زياتكەرلىك كلۋبتار قۇرىلىپ، ءوز قىزمەتىن جۇزەگە اسىرۋدا. جوباعا وبلىستىڭ ءىت-تەحنولوگيالار مەن روبوتوتەحنيكا، الەۋمەتتىك-گۋمانيتارلىق جانە عىلىمي-تەحنيكالىق باعىتتار بويىنشا ءىرى جوعارى وقۋ ورىندارى تارتىلعان. سونىمەن قاتار، ۆولونتەرلىك قوزعالىس پەن پىكىر-سايىس قوزعالىستارىنا دا باسا نازار اۋدارۋدامىز.
نەگىزىنەن جاستار ساياساتى سالاسىنا تەرەڭ اناليز جاساپ، سالانى اۆتوماتتاندىرۋ جانە جاڭا تەحنولوگيالاردى قولدانۋ باعىتىندا جۇمىس جاسالۋدا.
- قاراعاندى وبلىسىندا ءبىلىمدى، دارىندى جاستار كوپ. ولاردى قولداۋ، قارجىلاي كومەك بەرۋ جاعى قالاي، كوڭىلىڭىز تولا ما؟ جاستارمەن تۇراقتى بايلانىس بار ما؟
- شىنىمەن دە بىزدە العىر جاستار كوپ. ولارعا قاراپ كوڭىلىڭ تويادى. ەلىمىزدىڭ كوشىن العا تارتاتىن وسى دارىندى وسكەلەڭ جاستار. وسىنداي ماڭدايالدى جاستاردى قولداۋ ماقساتىندا ءبىز جوعارى وقۋ ورىندارى جانىنان زياتكەرلىك كلۋبتارىن اشىپ، جۇمىسىن جۇرگىزۋدەمىز. سونداي-اق، پىكىر-سايىس قوزعالىسىنا دا باسىمدىق بەرىلۋدە.
جاستار باستامالارىن قولداۋ ءۇشىن وبلىس باسقارماسى جانە جرو مەملەكەتتىك الەۋمەتتىك تاپسىرىس اياسىندا جاستار ساياساتىنىڭ بارلىق سالالارىن قامتيتىن ارنايى جوبالاردى ۇيىمداستىرادى. مىسالى، مەملەكەتتىك جاستار ساياساتى سالاسىنداعى قولدانىستاعى مەملەكەتتىك باعدارلامالار مەن ترەندتەردى ءتۇسىندىرۋ بويىنشا شالعاي اۋىلدىق ايماقتارعا «جاستار-جاستارعا» اقپاراتتىق-ءتۇسىندىرۋ كەرۋەندەرى، ۆولونتەرلىك قىزمەتتى، اسكەري-پاتريوتتىق تاربيەنى، قالالار مەن اۋدانداردىڭ جرو قىزمەتكەرلەرىن، ستۋدەنتتىك جاستاردى جانە ت.ب. قولداۋ بويىنشا ءىس-شارالار بار.
- وبلىستىڭ ءار اۋدان، قالاسىندا «جاستار رەسۋرستىق ورتالىعى» مەن ءتۇرلى ۇيىمدار جۇمىس ىستەيدى. ولار ناقتى نەمەن اينالىسادى؟
- جاستار رەسۋرستىق ورتالىقتارى جەرگىلىكتى جەرلەردەگى مەملەكەتتىك جاستار ساياساتىنىڭ نەگىزگى جولسەرىكتەرى بولىپ تابىلادى جانە جاستاردى تابىستى الەۋمەتتەندىرۋگە، وبلىستىڭ الەۋمەتتىك-ەكونوميكالىق دامۋىنا ينتەگراتسيالاۋعا باعىتتالعان شارالار كەشەنىن جۇزەگە اسىرادى.
اعىمداعى جىلى قالالار مەن اۋدانداردىڭ جرو ءىس-شارالارىن ۇيىمداستىرۋعا جانە وتكىزۋگە قارجىلاندىرۋدىڭ جالپى كولەمى 310 ملن. تەڭگەنى قۇرادى.
بۇگىنگى كۇنى وبلىس بويىنشا 19 جرو جۇمىس اتقارادى. ونىڭ ىشىندە 1 وبلىستىق دەڭگەيدە، قالعاندارى قالالار مەن اۋدانداردا ىشكى ساياسات بولىمدەرى جانىنداعى كوممۋنالدىق مەملەكەتتىك مەكەمەلەر تۇرىندە جۇمىس اتقارادى. 2020 جىلى قالالار مەن اۋدانداردىڭ جرو 624 057 مىڭنان استام جاستاردى قامتي وتىرىپ، 3096 مىڭنان استام ءىس-شارا وتكىزدى.
ايتا كەتۋ كەرەك، ەرىكتىلەر جىلى اياسىندا جرو پاندەميا كەزىندە حالىققا كومەك كورسەتۋ بويىنشا ۇلكەن جۇمىس جۇرگىزدى. ءبىر سوزبەن ايتقاندا، جاستار رەسۋرستىق ورتالىعى - جاستارعا قانداي دا ءبىر كومەك كەرەك بولعان جاعدايدا العاشقى تابان تىرەيتىن بىردەن ءبىر مەكەمە.
- جاستار ۇيىمدارى ءسوز بولعاندا ەرىكتىلەر قوزعالىسى ەرىكسىز ەسكە تۇسەدى. قوعامداعى ەرىكتى جاستاردىڭ قىزمەتىن قالاي باعالايسىز؟
- كەز كەلگەن مەملەكەتتىڭ قوزعاۋشى كۇشى، كەمەل كەلەشەگىنىڭ جارقىن كەپىلى – جاستار. مەملەكەت باسشىسى قاسىم-جومارت كەمەلۇلى 2019 جىلدى «جاستار جىلى»، 2020 جىلدى «ۆولونتەرلەر جىلى» دەپ جاريالاعاندا، ەلىمىزدىڭ جاس قاۋىمىنا، جاس بۋىنىنا ۇلكەن ءۇمىت پەن سەنىم ارتسا كەرەك. بۇل سەنىمدى جاستار تولىعىمەن اقتادى. بۇكىل الەمدى جايلاعان پاندەميا ۋاقىتىندا قوعامداعى ەرىكتى جاستاردىڭ قىزمەتى ايرىقشا بولدى.
دارىگەرلەر، مۇعالىمدەر، زاڭ قىزمەتكەرلەرى مەن قاتار ەرىكتى جاستار دا قاۋىپتى ىندەت وشاقتارىندا باستارىن بايگەگە تىگىپ، قىرۋار شارۋا اتقاردى. كوپ بالالى انالار، قارتتار مەن مۇگەدەك جاندار جانە دە تاعى دا باسقا كومەككە مۇقتاج جاندارعا ارنالعان قايىرىمدىلىق اكتسيالار ۇيىمداستىرىپ، ازىق-تۇلىك سەبەتتەرى مەن ءدارى-دارمەكتەر تاراتۋعا ات سالىستى. جانە دە وسى ءۇردىس ءالى دە جالعاسىن تابۋدا. ەڭبەگىنە اقى سۇرامايتىن، قايىرىمدى، جىگەرلى جاستاردىڭ قىزمەتىن جوعارى باعالايمىن.
- جاستاردى تولعاندىراتىن 3 تۇيتكىل: ءبىلىم، باسپانا، جۇمىس. باسقارما تاراپىنان اتالعان ماسەلەلەردىڭ شەشىلۋىنە ناقتى قانداي شارالار قولعا الىنۋدا؟
- ءبىزدىڭ وبلىستىڭ ءاربىر بەسىنشى تۇرعىنى – جاس ادام. اتاپ ايتقاندا، بۇگىنگى تاڭدا قاراعاندى وبلىسىندا 14-28 جاس ارالىعىنداعى 261 153 (19,%) جاس ازامات تۇرادى. قالا جاستارى – 196 194 ادام (75,1%), اۋىل جاستارى – 64 959 ادام (24,9%). وبلىس بويىنشا 9 جوعارى وقۋ ورنى مەن 69 كوللەدجدە 80 مىڭعا تارتا جاس ءبىلىم الۋدا.
وقۋ ورنىنا تۇسۋدەگى ەڭ باستى ماسەلە ول – باسەكەگە قابىلەتتىلىك. ىزدەنىمپاز، بىلىمقۇمار ادام ارقاشان كوشتىڭ باسىندا تۇرادى. قازىر ءبىلىم الۋعا بارلىق جاعدايلار جاسالعان دەپ بىلەمىن. ءتىپتى وبلىسىمىزدان، رەسپۋبليكامىزدان تىس جەرلەردە ءبىلىم الىپ، بىلىكتىلىگىن جەتىلدىرىپ جۇرگەن جاستار جەتەرلىك. مەملەكەت تاراپىنان گرانتتار ءبولىنىپ، ءتۇرلى باعدارلامالاردىڭ جۇزەگە اسىرىلۋى جاستاردىڭ جان-جاقتى ءبىلىم الۋىنا، ەڭبەك نارىعىنان ءوز ورنىن تابۋعا مول مۇمكىندىك بەرەدى.
مىسالى ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى بويىنشا ەڭبەك نارىعىنىڭ قاجەتتىلىكتەرىن ەسكەرە وتىرىپ، تەحنيكالىق جانە كاسىپتىك ءبىلىمى بار كادرلاردى دايارلاۋعا 2021 جىلدىڭ 1 قىركۇيەگىنەن باستاپ - 700 ادام جىبەرۋ جوسپارلانۋدا;
«باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋعا 497 ادام جىبەرىلدى، بيزنەس-جوبالاردى ىسكە اسىرۋدى جوسپارلاپ وتىرعان باعدارلاماعا قاتىسۋشىلارعا 113 ميكروكرەديت، 231 گرانت بەرىلدى. جاستار مەملەكەت تاراپىنان جاسالاتىن وسىنداي مۇمكىندىكتەردى پايدالانۋى ءتيىس.
ال ەندى باسپانا ماسەلەسىنە كەلەتىن بولساق، باسقارمامەن جەتىم بالالار مەن اتا-اناسىنىڭ قامقورلىعىنسىز قالعان بالالاردى تۇرعىن ۇيمەن قامتاماسىز ەتۋ جۇمىسىنا مونيتورينگ جۇرگىزىلەدى. بىرنەشە جىلدان بەرى وبلىستا وسى ساناتتاعى جاستاردى تۇرعىن ۇيمەن قامتاماسىز ەتۋدىڭ كەشەندى جوسپارى جۇزەگە اسىرىلۋدا. اعىمداعى جىلى 226 پاتەر بەرۋ جوسپارلانعان. 2020-2022 جىلدار ارالىعىندا وبلىستىڭ وڭىرلەرىندە اتالمىش ساناتتاعى جاستارعا بارلىعى 618 پاتەر بولىنەتىن بولادى. (2020 جىلى-166 پاتەر، 2021 جىلى - 226 پاتەر، 2022 جىلى-226 پاتەر).
ءوزىڭىز اتاپ وتكەندەي جاستار اراسىنداعى جۇمىسسىزدىق تۇيتكىلدى ماسەلە. 2021 جىلعى 1 تامىز جاعدايى بويىنشا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا 25 083 ادام جۇگىنگەن، ونىڭ ىشىندە جاستار قاتارىنان 9 591 ءوتىنىش بىلدىرگەندەر جانە جۇمىسقا ورنالاسقاندار 41% (بارلىعى 21 317 ادام جۇمىسقا ورنالاستىرىلدى).
«ديپلوممەن-اۋىلعا!» جوباسى اياسىندا 2020 جىلى اۋىلعا كەلگەن 626 جاس مامان كوتەرمە جاردەماقى جانە تۇرعىن ءۇي ساتىپ الۋعا بيۋدجەتتىك نەسيە الدى (2019 ج. - 455).
اعىمداعى جىلدىڭ 1 تامىزىنا 167 مامانعا (117 - ءبىلىم بەرۋ، 38 - دەنساۋلىق ساقتاۋ، 5 مادەنيەت، 2 سپورت، 4 اوك ماماندارىنا) تۇرعىن ءۇي ساتىپ الۋعا 708,5 ملن.تەڭگەدە بيۋدجەتتىك كرەديتتەر بەرىلدى.
220 مامان 64,8 ملن. تەڭگەگە كوتەرمە جاردەماقى الدى (129 - ءبىلىم بەرۋ، 58 - دەنساۋلىق ساقتاۋ، 3 - الەۋمەتتىك قامسىزداندىرۋ، 8 – مادەنيەت، 6 - سپورت، 11 – اگروونەركاسىپتىك كەشەن، 5 - مەملەكەتتىك قىزمەتشى).
بۇگىنگى تاڭدا كوتەرمە جاردەماقى مەن بيۋدجەتتىك نەسيە العان مامانداردىڭ جالپى سانىنان جاستاردىڭ ۇلەسى ارتىپ، 84,7% - دى قۇرادى. بۇل 29 جاسقا دەيىنگى 309 مامان (365 ماماننان).
2020 جىلعى ەڭبەك ماۋسىمىندا «جاسىل ەل» جاساقتارىندا 1413 ادام جۇمىسقا ورنالاستىرىلدى (2019 ج. - 1505). اعىمداعى جىلى كەمىندە 1800 ادامدى جۇمىسقا ورنالاستىرۋ جوسپارلانۋدا. «ZhasProject» جوباسى اياسىندا 2020 جىلى جالپى سوماسى 155 ملن.تەڭگەگە 155 بيزنەس-جوبا (527 قاتىسۋشى) گرانتىن جەڭىپ الدى.
جاستار كاسىپكەرلىگىن قولداۋ جانە دامىتۋ ءۇشىن 2020 جىلى وبلىس اكىمىنىڭ 100 ملن.تەڭگە سوماسىنا 100 گرانت ءبولىندى (2019 جىلى - 10 ملن. تەڭگە جالپى سوماسىنا 10 گرانت). 2021 جىلى جالپى سوماسى 100 ملن.تەڭگەگە 100 گرانت بولىنەدى. تۇراقتى نەگىزدە جاس كاسىپكەرلەردىڭ قىزمەتىنە مونيتورينگ جۇرگىزىلەدى.
جۇرگىزىلگەن جۇمىس ناتيجەسىندە سوڭعى 3 جىلدا NEET-جاستار ۇلەسىنىڭ تومەندەگەنى بايقالادى (2018 ج. - 12,5%، 2019 ج. - 12,3%، 2020 ج. - 11,5%). 2021 جىلدىڭ 1-توقسانىنىڭ قورىتىندىسى بويىنشا NEET - جاستاردىڭ ۇلەسى 9,9%-دى قۇرايدى، بۇل 2020 جىلدىڭ ۇقساس كەزەڭىمەن سالىستىرعاندا 2,1% - عا تومەن (2020 جىلدىڭ 1-توقسانى-12,0%).
- جاستار ءۇشىن ەڭ وزەكتى ماەلەلەردىڭ ءبىرى – باسپانامەن قامتۋ ەكەنى داۋسىز. بىلتىردان بەرى قر تۇڭعىش پرەزيدەنتى-ەلباسىنىڭ پارمەنىمەن ءىرى قالالارداعى جۇمىسشى جاستارعا ارناپ جالدامالى پاتەرلەر بەرىلە باستادى. وبلىستا وسى باعدارلامانىڭ بالامىلى نۇسقاسىن ىسكە قوسۋ جوسپاردى بار ما؟
- قازىرگى ۋاقىتتا جاستار ورتاسىنىڭ ەڭ وزەكتى ماسەلەلەرىنىڭ ءبىرى تۇرعىن ءۇيدىڭ قولجەتىمدىلىگى بولىپ تابىلادى. جىل سايىن باسپانا كەزەگىندە تۇرعانداردىڭ سانى وسۋدە، ولاردىڭ كونتينگەنتى نەگىزىنەن جاس ماماندار مەن جاس وتباسىلار.
2021 جىل قورىتىندىسى بويىنشا وبلىسىمىزدا الەۋمەتتىك جاعىنان ءالسىز توپتاعى ازاماتتارعا 1099 پاتەر جالدامالى تۇرعىن ءۇي، ءۇي كەزەگىندە تۇرعان ازاماتتار ءۇشىن 478 نەسيەلىك تۇرعىن ءۇي پايدالاۋعا بەرۋ جوسپارلانعان.
جۋىردا عانا وتكەن وبلىس اكىمى جانىنداعى جاستار ءىسى جونىندەگى كەڭەستە وبلىس اكىمى ج. قاسىمبەك نۇر-سۇلتان، الماتى، شىمكەنت قالالارىنىڭ مىسالى نەگىزىندە قاراعاندى وبلىسىنىڭ جۇمىسشى جاستارىن باسپانامەن قامتۋ ماسەلەسىن شەشۋ بويىنشا تاپسىرما بەردى. اتالمىش باعىتتا جۇمىستار اتقارىلۋدا.
- ەل ەرتەڭىنىڭ تىرەگى بۇگىنگى جاستارىمىز تاۋەلسىزدىك جىلدارى ومىرگە كەلىپ، ءبىلىم مەن تاربيە الدى، ازامات بولىپ شىڭدالدى. جالپى ايتقاندا، ءسىزدىڭ ويىڭىزشا، تاۋەلسىزدىك قۇندىلىقتارىنىڭ جاستارعا تيگىزگەن يگى ىقپالى قانداي؟ ەگەمەندىك قازاقستاندىق جاستارعا نە بەردى؟
- تاۋەلسىزدىك قۇندىلىقتارى جاستارعا وي ەركىندىگى، رۋح ەركىندىگى، ءسوز ەركىندىگى سياقتى زور مۇمكىندىكتەر بەردى. تاۋەلسىزدىك العانعا دەيىن كەڭەس وداعىنىڭ شەكاراسى الەمگە جابىق بولاتىن، ال تاۋەلسىز ەلدىڭ جاستارى ءۇشىن الىس-جاقىن شەتەلدەردە قوعامنىڭ بارلىق سالاسىنا جولى اشىق، جاستاردىڭ تاڭداۋ مۇمكىندىگى مول. بۇگىنگى تاڭدا جاستارىمىز عىلىم مەن تەحنيكانى، IT-تەحنولوگيالاردى جەتىك مەڭگەرگەن. سونىمەن قاتار كوپتەگەن شەتەل تىلدەرىن يگەرگەن. وسىنداي بارلىق تاڭداۋلار مەن مۇمكىندىكتەردى جاستارعا بەرىلگەن تاۋەلسىزدىكتىڭ يگىلىكتەرى دەپ ءبىلۋىمىز كەرەك.
- جاستاردا ءبىز بايقاماي جۇرگەن تاعى قانداي ماسەلەلەر بار؟ ولاردى نەدەن باستاۋ كەرەك؟
- قانشا نازاردا دەگەنمەن بايقالماي قالاتىن ءبىر ماسەلە - ول جاستاردىڭ بوس ۋاقىتىن ۇيىمداستىرۋ ماسەلەسى دەپ ايتار ەدىم. جاستاردىڭ بوس ۋاقىتىن ءتيىمدى ءارى پايدالى ۇيىمداستىرۋ جولىندا وبلىسىمىزدا كەيىنگى جىلدارى اۋىز تولتىرىپ ايتۋعا بولاتىن جۇمىستار اتقارىلۋدا. ولار – جاستار ۇيلەرى، كوۆوركينگ ورتالىقتار، سپورتتىق-ساۋىقتىرۋ كەشەندەرى، ءتۇرلى كورتتار مەن سپورتتىق الاڭدار، Street Workout الاڭدارى جانە ت.ب. جاستارعا قاجەتتى كەشەندەر اشىلۋدا. بۇل اتالعان دۇنيەلەر جاستارعا وتە قاجەت ەكەنى انىق. سوندىقتان اتالمىش باعىتتاعى جۇمىستى ۇنەمى جەتىلدىرە بەرۋ كەرەك دەپ ويلايمىن.
- ءبىرجان نۇرجانۇلى، جاستارعا بەرەر كەڭەسىڭىز، اعالىق ءسوزىڭىز – جەتىستىككە جەتۋ جولىنداعى 3 قاعيدا قانداي بولماق؟
- ەڭ الدىمەن، جان دۇنيەسى باي بولماي وزىق عىلىم مەن ۇزدىك ءبىلىمدى يگەرمەي ەشبىر ەل الەمدىك وركەنيەت كوشىنە ىلەسە المايدى. مەنىڭشە، ءاربىر جاستىڭ جەتىستىككە جەتۋ جولىنداعى 3 قاعيداسى مىنانداي:
- ماقسات. قوعامنىڭ كەز كەلگەن سانالى مۇشەسىنىڭ بولشاققا باستار جولى ايقىن ماقسات ارقىلى عانا قۇرالادى.
- ىزدەنىس. بيىك ماقساتقا ۇمتىلعان كەز كەلگەن ادام ءومىر بويى ىزدەنىس ۇستىندە بولماق.
- ەڭبەك. سول تىنىمسىز ىزدەنىستىڭ ناتيجەسى زور ەڭبەك ارقىلى كەلەدى.
سول سەبەپتى، جاستارىمىزدىڭ ماقساتى ايقىن، ىزدەنىسى تىنىمسىز، ەڭبەگى جەمىستى بولسىن دەگىم كەلەدى.
- ءبىرجان نۇرجانۇلى، جاستاردىڭ يگىلىگى ءۇشىن اتقارىپ جاتقان جۇمىستارىڭىزعا جەمىس تىلەيمىن!
سۇحباتتاسقان: زارينا اشىربەك،
«ادىرنا» ۇلتتىق پورتالى
