دەنساۋلىق ساقتاۋ مينيسترلىگى 2026 جىلدىڭ 1 قاڭتارىنان باستاپ تمككك مەن ءمامس بويىنشا اۋرۋلار ءتىزىمىن وزگەرتتى، دەپ حابارلايدى "ادىرنا".
2026 جىلعى 1 قاڭتاردان باستاپ مىندەتتى الەۋمەتتىك مەديتسينالىق ساقتاندىرۋ ء(مامس) پاكەتى قۇرامىنا ەنگىزىلەتىن اۋرۋلار:
- قانت ديابەتى;
- بالالار تسەرەبرالدى سال اۋرۋى (بتسسا);
- دانەكەر ءتىننىڭ جۇيەلى زاقىمدانۋلارى;
- رەۆماتيزم.
بۇعان دەيىن بۇل اۋرۋلار تەگىن مەديتسينالىق كومەكتىڭ كەپىلدەندىرىلگەن كولەمى (تمككك) شەڭبەرىندە قارجىلاندىرىلىپ كەلگەن.
سونىمەن قاتار، ءمامس جۇيەسىندە ديناميكالىق باقىلاۋعا جاتاتىن اۋرۋلار بويىنشا مەديتسينالىق قىزمەتتەر تىزىمىنە ەنگەن:
- ارتەريالىق گيپەرتەنزيا;
- يشەميالىق جۇرەك اۋرۋى جانە وزگە جۇرەك اۋرۋلارى;
- جۇرەك جەتكىلىكسىزدىگى;
- اريتميالار، جۇرەكشەلەردىڭ فيبريللياتسياسى جانە ءدىرىلى;
- تومەنگى تىنىس جولدارىنىڭ سوزىلمالى اۋرۋلارى;
- گلومەرۋليارلىق اۋرۋلار;
- بۇيرەك اۋرۋلارى;
- اسقازان-ىشەك جۇيەسىنىڭ اۋرۋلارى;
- قيمىل-تىرەك جۇيەسى مەن دانەكەر ءتىن اۋرۋلارى;
- ەندوكريندىك جۇيە اۋرۋلارى، زات الماسۋ جانە تاماقتانۋ بۇزىلىستارى;
- ءزار شىعارۋ-جىنىس جۇيەسى اۋرۋلارى;
- تۋا بىتكەن اقاۋلار، دەفورماتسيالار جانە حروموسومالىق بۇزىلىستار.
"مەديتسينالىق كومەكتىڭ كولەمى قىسقارمايدى — تەك قارجىلاندىرۋ كوزى وزگەرەدى. ساقتاندىرىلعان بارلىق ازاماتتار بۇرىنعىداي تەگىن ەم، كەڭەس جانە ءدارى-دارمەك الادى", دەلىنگەن مينيسترلىك تۇسىندىرمەسىندە.
بۇدان بولەك، الەۋمەتتىك ماڭىزى بار بارلىق اۋرۋلاردىڭ باستاپقى دياگنوستيكاسى تمككك اياسىندا ازاماتتىڭ ساقتاندىرۋ مارتەبەسىنە قاراماستان جۇرگىزىلەدى. بۇعان دەيىن بۇل ەرەجە تەك ايتۆ جۇقتىرعاندار مەن تۋبەركۋلەزبەن اۋىراتىندارعا قاتىستى بولعان.
مينيسترلىك پىكىرىنشە، بۇل جاڭالىق اۋرۋلاردى ەرتە انىقتاپ، دەر كەزىندە ەمدەۋدى باستاۋعا مۇمكىندىك بەرەدى. سونىمەن قاتار مەملەكەت بۇرىنعىداي بالالار، جۇكتى ايەلدەر، زەينەتكەرلەر، ستۋدەنتتەر، مۇگەدەكتىگى بار ادامدار، جۇمىسسىزدار جانە باسقا دا جەڭىلدىكتى توپتار ءۇشىن بارلىق كەپىلدىكتەردى ساقتاپ وتىر. بارلىعى — 11 ميلليوننان استام قازاقستاندىق.
ولاردىڭ ىشىندە، بالالار تسەرەبرالدى سال اۋرۋى بار ناۋقاستار دا بار — ولار مەملەكەت ەسەبىنەن ساقتاندىرىلعان جانە تەگىن مەديتسينالىق كومەك الۋدى جالعاستىرادى.
بۇعان دەيىن مينيسترلىك الەۋمەتتىك ماڭىزى بار اۋرۋلاردىڭ جاڭا ءتىزىمىن بەكىتكەن. ەندى وعان 11 اۋرۋ كىرەدى:
- تۋبەركۋلەز;
- ايتۆ;
- سوزىلمالى ۆيرۋستىق گەپاتيتتەر جانە باۋىر تسيرروزى;
- ونكولوگيالىق اۋرۋلار;
- پسيحيكالىق جانە مىنەز-قۇلىق بۇزىلىستارى;
- جەدەل ميوكارد ينفاركتى (العاشقى 6 اي);
- سيرەك (ورفاندىق) اۋرۋلار;
- جۇيكە جۇيەسىنىڭ دەگەنەراتيۆتى اۋرۋلارى;
- ورتالىق جۇيكە جۇيەسىنىڭ دەميەلينيزيرلەۋشى اۋرۋلارى;
- ·ەپيلەپسيا;
- تسەرەبروۆاسكۋليارلىق اۋرۋلار (ينسۋلتتەن كەيىنگى 1 جىل ىشىندە).
بۇعان دەيىن حابارلانعانداي، 2026 جىلدىڭ 1 قاڭتارىنان باستاپ تمككك مەن ءمامس جۇيەسىندە كورسەتىلەتىن مەديتسينالىق كومەك تۇرلەرى جاڭارتىلعان فورماتتا ۇسىنىلادى.
