2024 جىلى مەديتسينالىق مەكەمەلەر قارجىلاندىرۋداعى زاڭ بۇزۋشىلىقتار سالدارىنان 550 ملرد تەڭگەدەن استام قاراجات الماي قالعان. بۇل تۋرالى ءماجىلىس دەپۋتاتى اسحات ايماعامبەتوۆ مالىمدەدى، دەپ حابارلايدى "ادىرنا" ۇلتتىق پورتالى.
بۇل مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىنە كەرى اسەرىن تيگىزىپ، مەديتسينالىق قىزمەتتەردىڭ قولجەتىمدىلىگى مەن ساپاسىنىڭ تومەندەۋىنە اكەلدى.
ايماعامبەتوۆتىڭ ايتۋىنشا، قارجىلاندىرۋ تاپشىلىعىنا لگوتالىق ساناتتار ءۇشىن جارنالاردى دۇرىس ەسەپتەمەۋ جانە رەسپۋبليكالىق بيۋدجەتتىڭ مىندەتتەمەلەرىن ورىنداماۋى سەبەپ بولىپ وتىر.
مەملەكەت زەينەتكەرلەر، بالالار جانە جۇكتى ايەلدەر سياقتى ازاماتتاردىڭ 15 ساناتى ءۇشىن جارنالاردى ورتاشا ەڭبەكاقىدان تولەۋى كەرەك. الايدا جارنالار مەديانالىق ەڭبەكاقى نەگىزىندە ەسەپتەلىپ، قارجىلاندىرۋ 300 ملرد تەڭگەگە قىسقارعان. قىسقارتىلعان سومانىڭ ءوزى تولىق بولىنبەگەندىكتەن، مەديتسينالىق مەكەمەلەر تاعى 252 ملرد تەڭگەدەن ايىرىلعان. بۇل جاعداي ءمامس جۇيەسىنە، ونىڭ ىشىندە وپەراتسيالار، وڭالتۋ، ءدارى-دارمەكپەن قامتاماسىز ەتۋ، مرت جانە كت قىزمەتتەرى سياقتى ماڭىزدى مەديتسينالىق قاجەتتىلىكتەرگە كەرى اسەرىن تيگىزگەن.
ايماعامبەتوۆ دەنساۋلىق ساقتاۋ مينيسترلىگىنىڭ جارنالاردى ازاماتتاردىڭ ەسەبىنەن ارتتىرۋ تۋرالى ۇسىنىسىن سىنعا الدى. ونىڭ ايتۋىنشا، بيۋدجەت الدىمەن ءوز مىندەتتەمەلەرىن ورىنداۋى ءتيىس.
