پرەزيدەنت قاسىم-جومارت توقاەۆتىڭ جولداۋىندا دەنساۋلىق ساقتاۋ سالاسىنا قاتىستى بىرنەشە ماڭىزدى باستاما كوتەرىلدى. ونىڭ قاتارىندا 70-كە جۋىق دەنساۋلىق ساقتاۋ نىسانىن، سەگىز زاماندىق پەريناتالدىق ورتالىق پەن جەتى كوپبەيىندى بالالار اۋرۋحاناسىن سالۋ، سونداي-اق العاشقى مەديتسينالىق-سانيتاريالىق كومەك كورسەتەتىن مامانداردىڭ ايلىعىن ءوسىرۋ ماسەلەسى دە بار.
بۇلار مەديتسينالىق ينفراقۇرىلىمدى جاڭعىرتۋعا، مەديتسينالىق قىزمەتتىڭ قولجەتىمدىلىگىن ارتتىرىپ، ازاماتتاردىڭ ءومىر ءسۇرۋ ساپاسىن جاقسارتۋعا باعىتتالعان. مەملەكەت باسشىسى بەلگىلەگەن باسىمدىقتىڭ ماڭىزى تۋرالى شىعىس قازاقستان وبلىستىق فتيزيوپۋلمونولوگيالىق ورتالىعىنىڭ ديرەكتورى رايفا سافيوللينوۆا پىكىر ءبىلدىردى.
ساراپشىنىڭ ايتۋىنشا، پرەزيدەنت جولداۋىنىڭ نەگىزگى وزەگىندە ادام، ونىڭ ءال-اۋقاتى مەن ءومىر ءسۇرۋ ساپاسى تۇر.
مەملەكەت باسشىسى الەۋمەتتىك ينفراقۇرىلىمدى، سونىڭ ىشىندە ودان ءارى جاڭعىرتۋدى قاجەت ەتەتىن دەنساۋلىق ساقتاۋ جۇيەسىن دامىتۋعا ەرەكشە نازار اۋداردى.
ەلىمىزدىڭ وڭىرىندە مەديتسينالىق مەكەمەلەر سالۋ باسىم باعىتتىڭ بىرىنە اينالماق. العاشقىدا اۋرۋحانالاردى، پەريناتالدىق ورتالىقتاردى، جەدەل مەديتسينالىق جاردەم ستانتسيالارى مەن بالالاردى وڭالتۋ ورتالىقتارىن قوسا العاندا، 70-كە جۋىق دەنساۋلىق ساقتاۋ نىسانى سالىنباقشى.
ەرەكشە قاجەتتىلىگى بار بالالارعا ارنالعان سپورت زالىن اشۋ كوزدەلگەن.
«جولداۋدىڭ ءون بويىندا باستى وي – ادام مەن ەلىمىزدە ساپالى ءومىر سۇرۋگە جاعداي جاساۋ ماسەلەسى ايقىن كورىنىس تاپقان.
دەنساۋلىق ساقتاۋ سالاسىنىڭ وكىلى رەتىندە بىرنەشە نەگىزگى باعىتتى اتاپ وتەر ەدىم. ارينە، مەديتسينالىق نىساندار قۇرىلىسىنىڭ اۋقىم العانى قۋانتادى. بۇل سالانىڭ دامۋىنا جاڭا سەرپىن بەرىپ، ينفراقۇرىلىمدى جاڭارتىپ، مەديتسينالىق كومەكتىڭ ساپاسىن ارتتىرۋعا سەپ بولادى»، – دەيدى رايفا سافيوللينوۆا.
پرەزيدەنت تاپسىرماسىنىڭ جەكە ءبىر باعىتى انا مەن بالانى قورعاۋعا ارنالعان. قازاقستاندا اۋقىمدى قۇرىلىس جۇمىسىنىڭ العاشقى كەزەڭىندە سەگىز زاماندىق پەريناتالدىق ورتالىق سالىنادى. سونىمەن قاتار اتىراۋ، اقتوبە، الماتى، شىمكەنت، قاسكەلەڭ، سەمەي مەن اقتاۋ قالاسىندا جەتى كوپبەيىندى بالالار اۋرۋحاناسى، استانادا ەكى مەديتسينالىق نىسان سالىنباق.
«جولداۋدا انا مەن بالانى قورعاۋ باسىمدىعى ناقتى بەلگىلەنگەن. ول ءۇشىن زاماندىق پەريناتالدىق ورتالىقتار مەن كوپبەيىندى اۋرۋحانا سالۋ قاجەت. بۇل بالالاردى وڭالتۋ قىزمەتىن دامىتادى. ەڭ باستىسى، بالالارىمىز ساپالى، بەيىندى جانە ماماندانعان مەديتسينالىق كومەك الا الادى»، – دەدى ساراپشى.
جولداۋداعى تاعى ءبىر ماڭىزدى باعىت – العاشقى مەديتسينالىق-سانيتاريالىق كومەكتى جاڭعىرتۋ. پرەزيدەنت جالپى پراكتيكا دارىگەرلەرىنىڭ وكىلەتتىكتەرىن كەڭەيتىپ، دەنساۋلىق ساقتاۋ سالاسىنىڭ باستاپقى بۋىنىن قارجىلاندىرۋ كولەمىن كەزەڭ-كەزەڭىمەن ارتتىرۋدى تاپسىردى.
«العاشقى مەديتسينالىق-سانيتاريالىق كومەكتى جاڭعىرتىپ، وسى دەڭگەيدە جۇمىس ىستەيتىن مامانداردىڭ وكىلەتتىگىن كەڭەيتۋگە ەرەكشە توقتالعىم كەلەدى. سونداي-اق باستاپقى بۋىن ماماندارىنىڭ جالاقىسىن 40 پايىزعا دەيىن كوتەرۋ كەرەك. ويتكەنى ناۋقاستى العاش قابىلدايتىن، اۋرۋدى انىقتاۋعا قاتىساتىن – ءدال وسى ماماندار. سوندىقتان مەديتسينا قىزمەتكەرلەرىنە كورسەتىلەتىن مۇنداي قولداۋدىڭ ماڭىزى زور»، – دەيدى رايفا سافيوللينوۆا.
جولداۋدا ەل دامۋىنىڭ ماڭىزدى باعىتتارى رەتىندە تسيفرلاندىرۋ مەن جاساندى ينتەللەكتىنى ەنگىزۋ ماسەلەسى دە قامتىلدى. پرەزيدەنت زاماندىق تەحنولوگيالاردى ەكونوميكانىڭ ءتۇرلى سالاسى مەن قوعامدىق ومىردە پراكتيكالىق تۇرعىدان قولدانۋ اياسىن كەڭەيتۋدى مىندەتتەدى. رايفا سافيوللينوۆانىڭ پىكىرىنشە، تسيفرلىق ترانسفورماتسيا دەنساۋلىق ساقتاۋ جۇيەسىن ودان ءارى جەتىلدىرۋ ءۇشىن دە وتە كەرەك.
