فوتو: bmcudp.kz
گونكونگتا مايمىل شەشەگىن جۇقتىرۋدىڭ تاعى ءبىر جاعدايى تىركەلدى. مامانداردىڭ مالىمەتىنشە، تامىز ايىنان بەرى قالادا 21 ادامنان ۆيرۋس انىقتالعان. بۇل 2026 جىلدىڭ باسىنان بەرى تىركەلگەن بارلىق جاعدايدىڭ شامامەن 70 پايىزىنا تەڭ، دەپ حابارلايدى "ادىرنا".
جەرگىلىكتى دەنساۋلىق ساقتاۋ باسقارماسىنىڭ حابارلاۋىنشا، ۆيرۋستى جۇقتىرعان – 29 جاستاعى ەر ادام. ونىڭ دەنەسىندە بورتپە پايدا بولىپ، دەنە قىزۋى كوتەرىلگەن جانە ليمفا تۇيىندەرى ۇلعايعان. زەرتحانالىق تالداۋ ناتيجەسىندە مايمىل شەشەگىنە شالدىققانى راستالدى. قازىرگى ۋاقىتتا ناۋقاستىڭ جاعدايى تۇراقتى.
ەپيدەميولوگيالىق تەكسەرۋ بارىسىندا تامىز ايىنان بەرى ۆيرۋس جۇقتىرعان 21 ادامنىڭ قاۋىپتى جىنىستىق قاتىناستا بولعانى انىقتالعان. ولاردىڭ باسىم بولىگى ەكپە الماعان.
سونىمەن قاتار ناۋقاستاردىڭ جارتىسىنان كوبى سوڭعى ايلاردا سەرىكتەستەرىمەن ينتەرنەت ارقىلى تانىسقان. كەيبىر ادامدار اۋرۋ بەلگىلەرى پايدا بولعاننان كەيىن بايلانىستا بولعان سەرىكتەستەرىن تابا الماعان. بۇل مامانداردىڭ ينفەكتسيانىڭ تارالۋ جولدارىن انىقتاۋىن قيىنداتىپ وتىر.
رەسمي دەرەكتەرگە سايكەس، گونكونگتا 2022 جىلدان بەرى مايمىل شەشەگىن جۇقتىرۋدىڭ 114 جاعدايى تىركەلگەن. ونىڭ 30-ى 2026 جىلدىڭ باسىنان بەرى انىقتالعان.
وسىعان بايلانىستى جەرگىلىكتى بيلىك ينفەكتسيانى جۇقتىرۋ قاۋپى جوعارى توپتاعى ازاماتتاردى ۆاكتسينا الۋعا جانە قاۋىپتى بايلانىستاردان ساق بولۋعا شاقىردى.
