«ءبىلىم قانداي بولسا، دياگنوز دا سونداي بولادى». داۋلەت مۇقاەۆ دەنساۋلىق ساقتاۋ مينيسترلىگىن سىنعا الدى

4612
Adyrna.kz Telegram

ءماجىلىس دەپۋتاتى داۋلەت مۇقاەۆ دەنساۋلىق ساقتاۋ مينيسترلىگىن سىنعا الدى. ايتۋىنشا، مەديتسينا سالاسىنداعى ستۋدەنتتەردىڭ بىلىمىنە ءمان بەرىلمەيدى. دەپۋتات سالاداعى سان سۇراقتىڭ كۇرمەۋىن شەشۋدى سۇرادى، دەپ حابارلايدى “ادىرنا” ۇلتتىق پورتالى. 

بالالارعا ءبىلىمدى دۇرىس بەرمەيمىز، سوسىن بىزگە قويىلاتىن دياگنوز دا سونداي بولادى. وقۋلىقتاردىڭ بارلىعى ورىسشادان قازاقشاعا اۋدارىلادى. ولارعا كەلەتىن تەستتەرىنىڭ دە ءمان-ماعىناسى جوق سۇراقتار.

مەن وسى ماسەلەنى اجار حانىمعا ايتىپ، شەت-جاعاسىن باستاعان كەزدە تەست ورتالىعىنان رەسمي تۇردە حاتتار كەلەدى. ء“بارى كۇشتى، ءبارى دۇرىس. ءبىلىم مينيسترلىگى بىزبەن جۇمىس جاسادى”، دەيدى. ال ولارعا حابارلاسسام، “مەديتسينا بىزگە مۇلدەم قاتىسى جوق”، دەپ، ءبارى ءبىر-بىرىنە سىلتەيدى. ورىسشا جاۋاپ بەرەدى.

ارينە، بالالار پاتريوت بولىپ، قازاق تىلىندە ءبىلىم العىسى كەلەدى. بىراق وقۋلىقتار دا دۇرىس ەمەس، قويىلىپ جاتقان سۇراقتار دا دۇرىس ەمەس. بۇل-ءبىر. ودان كەيىن، سىزدەردىڭ قويىپ جاتقان ستاتيستيكالارىڭىزدىڭ ءبارى وتىرىك. سىزدەر كۇشتى قىلىپ كورسەتەسىزدەر. جاي عانا جالاقىنىڭ ءوزىن، دارىگەرلەردىڭ جالاقىسى 454 مىڭ دەپ كورسەتەسىزدەر. مەن الەۋمەتتىك جەلىگە سالعاندا، مۇنداي اقشانى المايدى. تەك ۇيىقتاماي كۇنى-ءتۇنى جۇمىس ىستەگەندە عانا ونداي اقشا الامىز، دەيدى. سىزدەر وزدەرىڭىز دارىگەرلەردەن، ستۋدەنتتەردەن وپروس جاساپ كوردىڭىزدەر مە؟ وعان جوق دەپ جاۋاپ بەرەسىزدەر.

مەتوديكانى شەتەلدەن، سينگاپۋر، اقش، گەرمانيادان الامىز دەيسىزدەر. ولاردىڭ مينيمالدى جالاقىلارى 1,5 ملن تەڭگە. حالىقتان اقشا جيناعان كەزدە ءبىز سويتەمىز، ال حالىققا اقشا بەرەتىن كەزدە وتىرىك ستاتيستيكا جاسايمىز”،- دەدى دەپۋتات.

سونداي-اق، داۋلەت مۇقاەۆ مۇنداي قاتەلىكتەردەن كەيىن ءوزىمىز زارداپ شەگەمىز دەيدى.

پىكىرلەر