بەلگيا اۋرۋحانالارىنىڭ Covid-19 اۋرۋىن ەمدەۋ بولىمشەلەرىندە 50%-دان استام ورىن تولىپ قالدى. نيدەرلاندى، ۋكراينا مەن گەرمانيادا ۆيرۋسقا شالدىعۋشىلار رەكوردى جاڭاردى، فرانتسيا مەن ۇلىبريتانيادا اسا قاتاڭ كارانتين ەرەجەلەرى بار «قىزىل ايماقتار» پايدا بولادى. بۇل تۋرالى ۆۆس اگەنتتىگىنە سىلتەمە جاساپ، قازاقپارات حابارلادى.
يزرايل بيلىگى ەلدە قىركۇيەكتىڭ ورتاسىندا قايتا ەنگىزىلگەن لوكداۋن ناتيجە بەرگەنىن، ياعني ينفەكتسيانىڭ تارالۋى باسەڭدەگەنىن حابارلادى.
دەنساۋلىق ساقتاۋ مينيسترلىگىنىڭ حابارلاۋىنشا، سوڭعى تاۋلىكتە ەلدە Covid-19-دىڭ 4,1 مىڭ جاڭا جاعدايى انىقتالعان. بىراق ءۇشىنشى كۇن قاتارىنان كورسەتكىش تومەندەۋدە. يزرايلدە پاندەميا باستالعالى بەرى كوروناۆيرۋسقا شالدىعۋ جاعدايلارىنىڭ جالپى سانى 282 مىڭنان اسادى.
ەۋراپادا جاعداي ناشارلاپ بارادى گەرمانيادا سوڭعى تاۋلىكتە ءتورت مىڭ ادامنان اۋرۋ انىقتالعان. بۇل – ءساۋىر ايىنىڭ باسىنان بەرگى ەڭ جوعارعى تاۋلىكتىك كورسەتكىش. وتكەن سارسەنبىدە 16 ادام كوز جۇمعان. بيلىك مۇنى پاندەميانىڭ ەكىنشى تولقىنىمەن عانا ەمەس، قىركۇيەكتەن بەرى ەلدە تەستىلەۋ كولەمىنىڭ ايتارلىقتاي ارتۋىمەن دە بايلانىستىرادى.
ۋكراينا بيلىگى تاۋلىكتىك رەكوردتىق كورسەتكىشتى راستادى. سوڭعى 24 ساعاتتا 5 397 ادام اۋرۋعا شالىققان.
دجونس حوپكينس ۋنيۆەرسيتەتىنىڭ مالىمەتى بويىنشا، ەلدە كوروناۆيرۋس جۇقتىرعانداردىڭ جالپى سانى 252 مىڭ ادامدى قۇرايدى، 4800-ءى قايتىس بولعان.
بەيسەنبى كۇنى فرانتسيانىڭ بەس قالاسى، ليلل، ليون، گرەنوبل، سەنت-ەتەن جانە تۋلۋزا جوعارى قاۋىپ ايماقتارى بولىپ جاريالاندى. اتالعان قالالاردىڭ بارلىعىندا ينفەكتسيانىڭ تارالۋ كورسەتكىشى 1000 ادامعا شاققاندا 250-دەن اسقان. جاقىندا ەل پرەزيدەنتى ەممانۋەل ماكرون فرانتسيانىڭ كوپتەگەن ايماقتارىنا دا پاريج بەن مارسەلدە قولدانىلىپ جاتقان قاتاڭ شارالاردى ەنگىزۋ كەرەك دەپ مالىمدەدى. سوڭعى تاۋلىكتە بۇكىل ەل بويىنشا رەانيماتسيا بولىمشەلەرىنە كوروناۆيرۋس ينفەكتسياسىن جۇقتىرعان 143 ناۋقاس ءتۇستى.
نيدەرلاندىدا سوڭعى 24 ساعات ىشىندە بەس مىڭعا جۋىق ادامعا Covid-19 دياگنوزى قويىلعان.
يتاليادا توتەنشە جاعداي 2021 جىلعى قاڭتار ايىنا دەيىن ۇزارتىلدى. مۇندا دالادا دا، عيمارات ىشىندە دە ماسكا تاعۋ مىندەتتەلدى. بۇل تالاپ يتاليانىڭ بارلىق ايماعىنا قاتىستى.
شۆەتسيانىڭ ينتەرناتتارى مەن قارتتار ۇيىندە جاعداي كۇرت ناشارلاپ كەتتى.
ەسكە سالا كەتەيىك، شۆەتسيا – پاندەميامەن كۇرەسۋ ءۇشىن كارانتين ەنگىزبەگەن ساناۋلى ەلدەردىڭ ءبىرى. دجونس حوپكينس ۋنيۆەرسيتەتىنىڭ مالىمەتى بويىنشا، ەلدە 96,7 مىڭعا جۋىق ادام كوروناۆيرۋسپەن اۋىرىپ، 5 892 ادام قايتىس بولدى.
