قازاقستان مەكتەپتەرىندە بالالاردى سۋعا باتۋ فاكتىلەرى مەن جازاتايىم وقيعالاردان قورعاۋ ماقساتىندا ءجۇزۋ ساباقتارى ەنگىزىلمەك، دەپ حابارلايدى "ادىرنا" ۇلتتىق پورتالى.
بۇل باستاما بالالاردىڭ قاۋىپسىزدىگىن قامتاماسىز ەتىپ قانا قويماي، ولاردىڭ فيزيكالىق دامۋىنا دا وڭ اسەر ەتۋگە باعىتتالعان. وليمپيادا چەمپيونى دميتري ءبالانديننىڭ ايتۋىنشا، اتالعان جوبانى سۋ سپورتى فەدەراتسياسى تولىق قولداپ وتىر.
«بالالاردى ەرتە جاستان سۋدا وزدەرىن سەنىمدى ۇستاۋعا ۇيرەتۋ — ءومىرىن ساقتاپ قالۋدىڭ ەڭ ءتيىمدى جولدارىنىڭ ءبىرى. ءبىز بۇل باستامانىڭ كەڭىنەن جۇزەگە اسىرىلۋىن قولدايمىز»، — دەدى بالاندين.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، 2024 جىلى الەم بويىنشا 236 مىڭنان استام ادام سۋعا كەتىپ كوز جۇمعان، ونىڭ 82 مىڭى – بالالار. وسىعان بايلانىستى قازاقستاندا ءجۇزۋ ساباقتارىن مەكتەپ باعدارلاماسىنا ەنگىزۋ سۋداعى جازاتايىم وقيعالاردىڭ الدىن الۋدىڭ ماڭىزدى شاراسى رەتىندە قاراستىرىلىپ وتىر.
جوبا 2026 جىلدان باستاپ الماتى مەن استانادا پيلوتتىق رەجيمدە ىسكە قوسىلادى. ءساتتى جۇزەگە اسقان جاعدايدا باعدارلاما بۇكىل رەسپۋبليكا بويىنشا كەزەڭ-كەزەڭىمەن ەنگىزىلمەك.
