Qazaqstan mektepterınde balalardy suǧa batu faktılerı men jazataiym oqiǧalardan qorǧau maqsatynda jüzu sabaqtary engızılmek, dep habarlaidy "Adyrna" ūlttyq portaly.
Būl bastama balalardyŋ qauıpsızdıgın qamtamasyz etıp qana qoimai, olardyŋ fizikalyq damuyna da oŋ äser etuge baǧyttalǧan. Olimpiada chempiony Dmitrii Balandinnıŋ aituynşa, atalǧan jobany Su sporty federasiiasy tolyq qoldap otyr.
«Balalardy erte jastan suda özderın senımdı ūstauǧa üiretu — ömırın saqtap qaludyŋ eŋ tiımdı joldarynyŋ bırı. Bız būl bastamanyŋ keŋınen jüzege asyryluyn qoldaimyz», — dedı Balandin.
Düniejüzılık densaulyq saqtau ūiymynyŋ mälımetınşe, 2024 jyly älem boiynşa 236 myŋnan astam adam suǧa ketıp köz jūmǧan, onyŋ 82 myŋy – balalar. Osyǧan bailanysty Qazaqstanda jüzu sabaqtaryn mektep baǧdarlamasyna engızu sudaǧy jazataiym oqiǧalardyŋ aldyn aludyŋ maŋyzdy şarasy retınde qarastyrylyp otyr.
Joba 2026 jyldan bastap Almaty men Astanada pilottyq rejimde ıske qosylady. Sättı jüzege asqan jaǧdaida baǧdarlama bükıl respublika boiynşa kezeŋ-kezeŋımen engızılmek.
