جەلىدە اتا-انالار الماتى قالاسىنداعى №117 مەكتەپتىڭ وقۋشىلارى كۇزگى سالقىندا فلەشموب ءۇشىن دالادا ۇزاق ۋاقىت تۇرعانىن سىنعا الدى، دەپ حابارلايدى "ادىرنا" ۇلتتىق پورتالى Democrat.kz سايتىنا سىلتەمە جاساپ.
ايتۋلارىنشا، ۇستازدار وزدەرى كۇرتە كيىپ جۇرگەن كەزدە، جەڭىل كيىمدەگى بالالار بلوگەر مەن وپەراتور كەلگەنشە سىرتتا كۇتۋگە ءماجبۇر بولعان.
جەلى قولدانۋشىسىنىڭ جازۋىنشا، وقۋشىلار ۆيدەو تۇسىرۋگە ساعات 13:00-دە دايىن بولۋى كەرەك بولعان، بىراق بلوگەر مەن موبيلوگرافتىڭ كەلۋىن 13:50-گە دەيىن كۇتتى. وسى ۋاقىتتا اۋا تەمپەراتۋراسى +14°C بولىپ، بالالار تەك اق جەيدە كيىپ تۇرعان. اتا-انالار بۇل ارەكەتتى بالالاردى قورلاۋ دەپ باعالادى.
كەيبىر اتا-انالار الەۋمەتتىك جەلىلەردە مەكتەپتىڭ پاراقشا جۇرگىزىپ، بالالاردىڭ فوتوسى مەن ۆيدەوسىن جاريالاپ جاتقانىن سىنادى.
“بالالاردى جەڭىل كيىممەن جەلدە تۇرعىزۋ دۇرىس پا؟ ديرەكتوردى جازالاۋ كەرەك", "بالالاردى اتا-انا رۇقساتىنسىز نەگە تۇسىرەدى؟" دەپ ءتۇرلى پىكىر جازىلعان.
ال №117 مەكتەپ اكىمشىلىگى ءوز جاۋابىندا ءىس-شارانىڭ رەسپۋبليكا كۇنىنە وراي ۇيىمداستىرىلعانىن، فلەشموبتى ءتۇسىرۋ 15 مينۋتتان اسپاعانىن، ال اۋا تەمپەراتۋراسى +16 °C بولعانىن حابارلادى. مەكتەپ بۇل ارەكەتتى سانيتارلىق تالاپتارعا ساي دەپ سانايدى جانە الداعى ۋاقىتتا اتا-انالاردىڭ ەسكەرتۋلەرىن ەسكەرەتىنىن ايتتى.
دەپۋتات اسحات ايماعامبەتوۆ ءماجىلىس كۋلۋارىندا مۇعالىمدەردى ماجبۇرلەپ ۆيدەو تۇسىرۋگە قارسى ەكەنىن اتاپ ءوتتى. ونىڭ ايتۋىنشا، ءاربىر وقۋشى مەن مۇعالىمنىڭ رۇقساتىنسىز ولاردىڭ بەينەسىن ينتەرنەتكە جاريالاۋ زاڭسىز:
“بۇل – بالا بەينەسىنە دەگەن قۇقىق. رۇقساتسىز تۇسىرۋگە بولمايدى. قازىر جاساندى ينتەللەكت، ديپفەيك زامانى. دەرەكتەر وتە قۇندى. سوندىقتان قاۋىپ بار", - دەدى دەپۋتات ايماعامبەتوۆ.
دەپۋتات اتا-انالارعا بالالارىن مەكتەپتە فوتوعا تۇسىرۋگە رۇقسات بەرمەۋدى ۇسىنىپ، مۇنداي جاعدايعا نازار اۋدارۋعا شاقىردى.
