الماتى قالاسىنىڭ اكىمى دارحان ساتىبالدى ءبىلىم كۇنى الاتاۋ اۋدانىنداعى 2 مىڭ وقۋشىعا ارنالعان №230 «كەلەشەك مەكتەبىنىڭ» سالتاناتتى اشىلۋىنا قاتىسىپ، ۇستازدار مەن وقۋشىلاردى، اتا-انالاردى جاڭا وقۋ جىلىنىڭ باستالۋىمەن قۇتتىقتادى.
قالا اكىمى ءوز سوزىندە مەملەكەت باسشىسى قاسىم-جومارت توقاەۆتىڭ جۋىردا وتكەن ۇستازداردىڭ تامىز كونفەرەنتسياسىندا ادىلەتتى، قۋاتتى، قاۋىپسىز ءارى تازا قازاقستاننىڭ تىرەگى بولاتىن جاۋاپتى ءارى ادال ازاماتتاردى تاربيەلەۋ بارشانىڭ ورتاق مىندەتى ەكەنىن اتاپ وتكەنىنە توقتالدى.
«مەملەكەت باسشىسىنىڭ تاپسىرماسىنا سايكەس ەلىمىزدە «كەلەشەك مەكتەپتەرى» ۇلتتىق جوباسى اياسىندا 460 مىڭ وقۋشىعا ارنالعان 217 زاماناۋي مەكتەپ سالىندى. الماتى شاھارى – وسى ۇلكەن وزگەرىستەردىڭ الدىڭعى قاتارىندا تۇر»، - دەدى قالا باسشىسى.
بۇعان دەيىن قالادا جالپى سىيىمدىلىعى 24 300 ورىندىق 14 «كەلەشەك مەكتەبى» قولدانىسقا بەرىلسە، ءدال بۇگىن 10 500 وقۋشىعا ارنالعان 7 «كەلەشەك مەكتەبى» جانە «زەردەلى» شاعىناۋدانىنداعى 550 ورىندىق جالپى ءبىلىم بەرەتىن مەكتەپ ەسىگىن ايقارا اشتى.
سونىمەن قاتار قايتا جاڭعىرتۋدان وتكەن №160 مەكتەپ، بۇزىلىپ قايتا قۇرىلعان 340 ورىندىق №15 ينتەرنات، سونداي-اق قوسىمشا قۇرىلىس جۇرگىزىلگەن №112 جانە №174 مەكتەپتەر قايتا قولدانىسقا بەرىلدى. اتالعان نىسانداردىڭ پايدالانۋعا بەرىلۋى ناتيجەسىندە 1 015 قوسىمشا وقۋشى ورنى اشىلىپ، قالا بويىنشا جاڭادان ەنگىزىلگەن وقۋشى ورىندارىنىڭ جالپى سانى 12 065-كە جەتتى.
الاتاۋ اۋدانىندا 3 جاڭا نىسان اشىلدى. سونىڭ ءبىرى – 2 مىڭ وقۋشىعا ارنالعان №230 «كەلەشەك مەكتەبى».
جاڭا وقۋ جىلىندا مەكتەپ اۆتوبۋستارى 11 496 بالانى تاسىمالدايدى. بۇگىندە مەگاپوليستىڭ ءبىلىم بەرۋ جۇيەسىندە 42 000-نان استام پەداگوگ ەڭبەك ەتەدى. ال 32 000-نان استام بالا بۇگىن 1-سىنىپقا قادام باسىپ، مەكتەپ تابالدىرىعىن العاش اتتادى.
دارحان ساتىبالدى ۇستازداردىڭ جاس ۇرپاق تاربيەسىندەگى ايرىقشا ورنىنا توقتالىپ، ولاردىڭ ادال قىزمەتىنە ريزاشىلىعىن ءبىلدىردى. سونىمەن قاتار وقۋشىلاردى بىلىمگە ۇمتىلۋعا، ىزدەنۋگە جانە جاڭا يدەيالار باستاۋعا شاقىرىپ، اتا-انالارعا مەكتەپ پەن وتباسى اراسىنداعى ءوزارا سەنىم مەن بىرلىكتىڭ ماڭىزىن اتاپ ءوتتى.
