فوتو: تۇركىستان وبلىسى دەنساۋلىق ساقتاۋ باسقارماسى
تۇركىستان قالاسىنداعى № 3 وبلىستىق پەريناتالدىق ورتالىقتا 41 جاستاعى مارينا جۇرىمباەۆا ءۇش ۇلدى دۇنيەگە اكەلدى. جۇكتىلىك مەرزىمى 32 اپتا بولعان. بوسانۋ كەسار تىلىگى ادىسىمەن ءوتتى. بۇل تۋرالى وبلىستىق دەنساۋلىق ساقتاۋ باسقارماسى مالىمدەدى، دەپ حابارلايدى "ادىرنا".
مالىمەت بويىنشا، ۇل بالالاردىڭ سالماعى 1715, 1955 جانە 1999 گرامم بولدى.
"شالا تۋعاندىقتان نارەستەلەر ءومىرىنىڭ العاشقى تاۋلىگىندە تىنىس الۋ اپپاراتىنا قوسىلىپ، جانساقتاۋ بولىمشەسىندە 10 تاۋلىك دارىگەرلەردىڭ باقىلاۋىندا بولدى. جاعدايلارى تۇراقتالعان سوڭ سابيلەر اناسىمەن بىرگە ارنايى كۇتىمدى قاجەت ەتەتىن نارەستەلەر بولىمىنە اۋىستىرىلدى", - دەلىنگەن ۆەدومستۆو اقپاراتىندا.
اكەسى سابيلەرگە ايقىن، ايدىن جانە ارسەن ەسىمدەرىن بەردى. وتباسىندا بۇعان دەيىن ءبىر ۇل مەن ءبىر قىز تاربيەلەنىپ وتىر.
دارىگەرلەردىڭ ايتۋىنشا، ۇشەم - وتباسىندا 15 جىلدىق ۇزىلىستەن كەيىن دۇنيەگە كەلگەن سابيلەر.
نارەستەلەر 35 تاۋلىكتەن كەيىن اناسىمەن بىرگە قاناعاتتانارلىق جاعدايدا ۇيىنە شىعارىلدى.
