اقتاۋ قالاسىندا بىرنەشە ءۇي جىلۋسىز قالدى، دەپ حابارلايدى “ادىرنا” ءتىلشىسى.
اقتاۋدا 12 شاعىن اۋدانداعى بىرنەشە ءۇيدىڭ تۇرعىندارى جىلۋسىز قالعان. ال جاۋاپتىلار بۇل ماسەلەنىڭ سەبەبىن انىقتاۋدا.
اقتاۋ قالاسىنىڭ اكىمى ۇلىقبەك تناليەۆ جىلۋسىز قالعان تۇرعىنداردى سابىرعا شاقىرىپ، ماسەلەنى تەز ارادا شەشۋ ءۇشىن ءتيىستى جۇمىستار جۇرگىزىلىپ جاتقانىن حابارلادى.
12 شاعىن اۋدانداعى №42, 47, 32, 34 تۇرعىندارى بەينەجازبا جازعان بولاتىن. ءبىز الدىنان بەرى قالادا جىلۋ جەلىلەرىنە رەتتەۋ جۇمىستارىن جۇرگىزىپ كەلەمىز. قازىر 12 ش/ا №42, 47, 32 ۇيگە بارىپ تەكسەرىپ شىقتىق. كەيبىر پاتەرلەردە جىلۋ بار بولسا، كەيبىرىندە جىلۋ جەتكىلىكتى دەڭگەيدە ەمەستىگىن كوردىك. جىلۋدىڭ اينالىمىندا (تسيركۋلياتسيا) ماسەلە بار. قازىر سونى رەتتەۋ جۇمىستارى ءجۇرىپ جاتىر. سونىمەن قاتار كوپتەگەن ۇيدە تۇرعىندارىمىز پاتەرىشىلىك جىلۋ جۇيەسىن وزگەرتكەنىن بايقادىق. ماسەلەن، كەيبىر تۇرعىندار باتارەيانى بالكونعا شىعارعان، اينالما (پەرەمىچكا) قۇبىرلارى جوق. ايتا كەتەتىن جايت پاتەر ىشىندەگى باتارەيا جارىلعان جاعدايدا، وعان مەنشىك يەسى ءوزى جاۋاپتى. تۇرعىندار ءۇيدى كۇتىپ ۇستاۋعا جاۋاپتى مەكەمەمەن (پيك، ميب) بايلانىستا بولىپ، ورتاق جۇمىس ىستەۋى كەرەك. سوندا عانا ماسەلە تولىعىمەن شەشىلەدى. جىلۋ ماسەلەسىن بىرلەسىپ جۇمىس ىستەگەن كەزدە عانا شەشىلەتىندىگىن جەتكىزگىم كەلەدى. بارشا تۇرعىنداردى سابىرلىققا شاقىرامىن. قازىر كوپتەگەن نىساندا جىلۋدى ارتىعىمەن (پەرەگرەۆ) پايدالانۋ فاكتىسى انىقتالۋدا، اتالعان ماسەلەنى قاراستىرىپ، جىلۋ قىسىمىن رەتتەپ جاتىرمىز. سوڭعى كەزدەگى تۋىنداعان جىلۋ ماسەلەسى ماگيسترالدىق قۇبىرداعى اپات كەسىرىنەن بولدى. ول ءۇشىن رەتتەۋ جۇمىستارىن جۇرگىزۋدى قاجەت ەتەدى. سوندىقتان تۇسىنىستىكپەن قاراۋىڭىزدى سۇرايمىز، - دەدى باسشى.
