ءتىل عىلىمىنىڭ تارلانىن ەسكە الۋ شاراسىنا قر عىلىم جانە جوعارى ءبىلىم ءمينيسترى ساياسات نۇربەك، الماتى قالاسى اكىمىنىڭ ورىنباسارى ازامات قالدىبەكوۆ، قوعام قايراتكەرلەرى، وتاندىق جانە شەتەلدىك ءتىلتانۋشى عالىمدار مەن زيالى قاۋىم وكىلدەرى قاتىستى.
كونگرەسس بارىسىندا ساياسات نۇربەك مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى:
“شورا سارىباەۆ – ءتىل عىلىمىن دامىتۋعا، ونىڭ تاريحىن تەرەڭ زەرتتەۋگە ايرىقشا ەڭبەك سىڭىرگەن عيبراتتى عالىم. ول انا ءتىلىمىزدىڭ كوكجيەگىن كەڭەيتىپ، عىلىمي دامۋىنا زور ۇلەس قوستى. بەلگىلى اكادەميك قازاق ءتىلىنىڭ ايماقتىق سوزدىگىن قۇراستىرۋ ماقساتىندا ارنايى ەكسپەديتسيالار ۇيىمداستىرىپ، ىرگەلى زەرتتەۋلەر جۇرگىزدى. قازاق جانە تۇركى تىلدەرىنىڭ ديالەكتولوگيالىق اتلاسىن جاساۋعا بەلسەنە اتسالىستى، ءتىل ءبىلىمىنىڭ بيبليوگرافياسىن ازىرلەدى. عالىمنىڭ ەڭبەك جولىن وتاندىق عىلىمعا دەگەن ادالدىقتىڭ وزىق ۇلگىسى دەۋگە بولادى”،- دەلىنگەن پرەزيدەنت قۇتتىقتاۋىندا.
كونگرەسكە تۇركيا، ازەربايجان، وزبەكستان جانە قىرعىزستاننان كەلگەن جەتەكشى عالىمدار ءسوز الدى. ولار بۇل شارانىڭ بۇكىل تۇركى جۇرتىنا ورتاق ەكەنىن مالىمدەپ، عىلىمي زەرتتەۋلەرىن ءبولىستى. 
"شورا سارىباەۆتان عىلىممەن شىنايى اينالىسۋدىڭ جولىن ۇيرەندىك. ارتىندا قالعان مۇرالارىن زەرتتەي كەلە، ونىڭ تەك عىلىمعا عانا ەمەس، عىلىممەن اينالىسۋ ادىستەمەسىنە دە ۇلكەن ۇلەس قوسقانىن كورىپ وتىرمىز. ول – ناعىز اكادەميالىق مەكتەپتىڭ وكىلى" – دەيدى عالىمنىڭ شاكىرتى قالامقاس سەيدوللاقىزى.
ءىس-شارادا شورا سارىباەۆتىڭ عىلىمي مۇراسى جيناقتالعان 6 كىتاپتىڭ تۇساۋى كەسىلدى.
ايتا كەتەيىك، شورا سارىباەۆ 1925 جىلى 2 ناۋرىزدا تاشكەنتتە دۇنيەگە كەلگەن. ونىڭ اكەسى، شامعالي حارەسۇلى سارىباەۆ، قازاق ءتىلى ءادىسناماسىنىڭ نەگىزىن سالۋشىلاردىڭ ءبىرى بولعان.
شورا سارىباەۆ قازمۋ-دى 1950 جىلى ءبىتىرىپ، 1953 جىلى اسپيرانتۋراسىن اياقتاعان. 1954-1995 جىلدارى ا.بايتۇرسىنۇلى اتىنداعى ءتىل ءبىلىمى ينستيتۋتىندا قازاق ءتىلى تاريحى مەن ديالەكتولوگياسى ءبولىمىنىڭ مەڭگەرۋشىسى قىزمەتىن اتقارعان. ول قازاق ءتىلىنىڭ ديالەكتولوگياسى، لەكسيكولوگياسى، ءتىل مادەنيەتى، قازاق ادەبي ءتىلىنىڭ تاريحى جانە قازاق-ورىس تىلدىك بايلانىستارى سالاسىندا تەرەڭ زەرتتەۋلەر جۇرگىزگەن.
عالىم قازاق ءتىلىنىڭ اۋىزشا سويلەۋ مادەنيەتىن زەرتتەپ، ورىس تىلىمەن قارىم-قاتىناسى ناتيجەسىندە پايدا بولعان كىرمە سوزدەرگە تالداۋ جاسادى. سونىمەن قاتار، تۇركولوگيا سالاسىندا دا اۋقىمدى جۇمىستار اتقارىپ، قازاق ءتىلىن باسقا تۇركى حالىقتارىنىڭ تىلدەرىمەن سالىستىرا وتىرىپ زەرتتەگەن. 250-دەن استام عىلىمي ماقالالارى مەن وقۋلىقتارى، مونوگرافيالارى جارىق كورگەن. “قازاق ءتىلىنىڭ قىسقاشا ەتيمولوگيالىق سوزدىگى”، “قازاق ءتىلىنىڭ ديالەكتولوگيالىق سوزدىگى”، “جاڭا اتاۋلار سوزدىگى” كىتاپتارىنىڭ قۇراستىرۋشىلاردىڭ ءبىرى. “قازاقتىڭ ايماقتىق لەكسيكوگرافياسى”،“قازاق ءتىل ءبىلىمىنىڭ بيبليوگرافيالىق كورسەتكىشى” اتتى 6 تومدىق ەڭبەكتىڭ جانە “تۇركىتانۋ ادەبيەتىنىڭ بيبليوگرافياسىنىڭ” اۆتورى. شورا سارىباەۆ 2018 جىلى 93 جاسىندا ومىردەن ءوتتى.
