ەندى پرەزيدەنت جانىنداعى ۇلتتىق عىلىم اكادەمياسىنا اكادەميك بولىپ سايلانۋعا بولادى، بىراق ول وڭاي ەمەس، اتاقتان ۇمىتكەر كونكۋرستان وتەدى، سوڭعى ون جىلدا ون عىلىمي ماقالاسى بولۋى كەرەك. اشىق نقا پورتالىندا تالقىلاۋ ءۇشىن جاريالانعان ەرەجە وسىلاي دەيدى.
✔ ال مۇرات جۇرىنوۆ باسقاراتىن ۇلتتىق عىلىم اكادەمياسىنىڭ اكادەميكتەرى زەينەت جاسىنا جەتكەن سوڭ قۇرمەتتى اكادەميك اتانىپ، اي سايىن مەملەكەتتەن ستيپەنديا الادى.
م.جۇرىنوۆ باسقاراتىن ۇعا جويىلمايدى، بىراق قوعامدىق ۇيىم بولىپ قالادى. ءيا، كادىمگى ۇەۇ – نپو. ەندى بۇل ۇيىم باسقالار سياقتى تسپگي-گە جىل سايىن بولىنەتىن ميللياردتاعان قاراجاتتان ۇلەس الىپ، جوبا ۇسىنۋىنا بولادى.
بىراق، بۇرىنعى اكادەميانىڭ سايتىندا ەش جاڭالىق جوق، ەكس-پرەزيدەنت كەزىندەگى اقپارات ءالى جاڭارتىلماپتى. سوعان قاراعاندا، ول كىسىلەر جاڭا ەرەجەنى كۇتىپ وتىر.
✔ 2020 جىلعى مالىمەتكە سايكەس، ۇعا قوعامدىق بىرلەستىگىندە 148 اكادەميك بولعان، ونىڭ ىشىندە ەكس-پرەزيدەنت نۇرسۇلتان نازارباەۆ پەن دينارا نۇرسۇلتانقىزى كۋليباەۆا بار. (ول كىسىلەر دە ستيپەنديا الا ما، قىزىق).
بيشىمباەۆتار وتباسىنان ەكى ادام اكادەميك ەكەن.
2011 جىلى اكادەميا عيماراتىندا عالىمداردىڭ تاۋەلسىزدىكتىڭ 20 جىلدىعىنا ارنالعان فورۋمى وتكەن. وعان ەلباسى نۇرسۇلتان نازارباەۆ قاتىسقان. عيماراتقا سول 2011 جىلى دا كۇردەلى جوندەۋ جاسالعان، ايتپاقشى.
فورۋمدا گەولوگيا ينستيتۋتىنىڭ عالىمدارى وزدەرى اشقان جاڭا مينەرالدى نۋرنازەن دەپ اتاۋدى ۇسىنعان. ول ۇسىنىستى حالىقارالىق كوميسسيا بەكىتتى مە، جوق پا، ونى گەولوگتار بىلەدى.
ەكس-پرەزيدەنتكە «عاسىر عۇلاماسى» اتاعى وسى فورۋمدا بەرىلدى. ونى سول كەزدەگى ءبىلىم-عىلىم ءمينيسترى باقىتجان جۇماعۇلوۆ پەن ۇعا پرەزيدەنتى مۇرات جۇرىنوۆ تابىس ەتكەن.
نۇرسۇلتان ءابىشۇلى ءوز كەزەگىندە: «ناقتى عىلىمدا ەشقانداي جاڭالىق اشقان جوقپىن، بىراق ءبىز تاريحتا بولماعان جاڭا مەملەكەت قۇردىق. بۇل – ەڭ مارتەبەلى ماراپات»، - دەپ العىس بىلدىرە قابىل العان.
✔ «عىلىم تۋرالى» جاڭا زاڭ وسى جىلدارى قابىلداندى. نەگىزى ول دا جامان زاڭ ەمەس ەدى دەيدى عالىمدار.
✔ 2012 جىلى عىلىمعا 42 ميلليارد تەڭگە ءبولىنىپتى. بۇل سوما 2015 جىلى 118 ميللياردقا جەتەدى دەلىنگەن.
✔ 2011 جىلى قازاقستانداعى عالىمداردىڭ ورتاشا جاسى 55-تە بولسا، قازىر 58 دەپ ەسەپتەلەدى.
✔ وسى فورۋمدا 2014 جىلى عىلىمدى قارجىلاندىرۋ ءىجو-ءنىڭ 1 پايىزى بولادى دەپ ۋادە بەرىلگەن. بىراق، بۇل كورسەتكىش ءالى 0,13 پايىز توڭىرەگىندە.
تاعى ءبىر دەرەك، قازۇۋ-ءدىڭ فيلولوگيا ماگيسترى اننا دانچەنكو وسى فورۋمدا «شۇرايلى قازاق تىلىندە عىلىمدى نەگە تاڭداعانىن مايىن تامىزا ايتىپ بەرىپتى». قازىر اننا عىلىمدا ءجۇر مە، الدە كونتسەرت جۇرگىزىپ جۇرگەن سول قىز با، بىلسەڭىزدەر جازا كەتىڭىزدەر.
ءيا، وتىز جىلعى عىلىم تاريحىندا وسىنداي ساتتەر بولعان، ءبارى تاسقا باسىلىپ، جازۋلى تۇر.
تاريح وتكەننەن ساباق الۋ ءۇشىن دە كەرەك. رەپۋتاتسيا ينستيتۋتى دا استە-استە قالىپتاسار.
جاڭا ەرەجە 23 شىلدەگە دەيىن تالقىلانادى، اشىق پورتالدا تۇر.
دينا يمامباي
